മാനസസരോവർ യാത്ര ജൂൺ മുതൽ

ന്യൂഡൽഹി: അഞ്ചുവർഷത്തിനുശേഷം കൈലാസ മാനസസരോവർ യാത്ര ഇന്ത്യ പുനരാരംഭിക്കുന്നു. തീർഥാടകരിൽ നിന്ന് വിദേശകാര്യമന്ത്രാലയം അപേക്ഷ ക്ഷണിച്ചു. 750 പേർക്കാണ് അവസരം. ജൂൺ–- ആ​ഗസ്‌ത്‌ കാലയളവിലാണ് യാത്ര. kmy.gov.in. വെബ്സൈറ്റ് വഴിയാണ് അപേക്ഷിക്കേണ്ടത്.50 പേരടങ്ങുന്ന അഞ്ച് ബാച്ച് ഉത്തരാഖണ്ഡ് ലിപുലേക്ക് പാസ് വഴിയും 50 പേരടങ്ങുന്ന പത്തു ബാച്ച് സിക്കിമിലെ നാഥു ലാ പാസ് വഴിയുമാണ് മാനസസരോവരിലെത്തുക.

2020ൽ കോവിഡിനെ തുടർന്നും ​ഗൽവാൻ‌ സംഘർഷ പശ്ചാത്തലത്തിലും നിർത്തിവച്ചിരുന്ന യാത്ര പുനരാരംഭിക്കാൻ ഇന്ത്യയും ചൈനയും തമ്മിൽ ചർച്ചകൾ നടത്തിയിരുന്നു. വിദേശകാര്യം, ആഭ്യന്തര മന്ത്രാലയങ്ങൾ, ഇന്തോ ടിബറ്റൻ പൊലീസ്, ഡൽഹി, സിക്കിം, ഉത്തരാഖണ്ഡ് സർക്കാരുകൾ, വിവിധ സർ‌ക്കാർ ഏജൻസികൾ എന്നിവ സംയുക്തമായാണ് യാത്ര സംഘടിപ്പിക്കുന്നത്.