അറിവിന് നോ ലിമിറ്റ്; ചോദ്യശരങ്ങളുടെ മുനയൊടിച്ച യോ​ഗ ടീച്ചർ

തിരുവനന്തപുരം: യോ​ഗ ആത്മീയതയുടെ പ്രത്യേക ചട്ടക്കൂടിനുള്ളിലായിരുന്ന കാലത്ത് യോ​ഗയെ ജീവിതമാക്കി... ഇന്നിപ്പോൾ ആയിരത്തിലേറെ വിദ്യാർഥികളുടെ പ്രിയപ്പെട്ട അധ്യാപക. കേരള സർവകലാശാലയിലെ യോ​ഗ അധ്യാപകയായ കെ എസ് ഷീജ... പതിനാല് വർഷങ്ങൾക്ക് മുമ്പ് എംഎസ് സി ജിയോ​ഗ്രഫി, ബിഎഡ് ബിരുദക്കാരി യോ​ഗ പഠിക്കാൻ ചേർന്നപ്പോൾ പലവിധ സംശയങ്ങളായിരുന്നു. മുസ്ലീം കുടുംബത്തിൽ നിന്നൊരാൾ എങ്ങനെ യോ​ഗ പരിശീലിക്കും, ഇത്രയും വിദ്യാഭ്യാസമുള്ളയൊരാൾക്ക് വേറെ പണിക്കിട്ടില്ലേ തുടങ്ങിയ ചോദ്യശരങ്ങൾ. പക്ഷേ ആ ചോദ്യങ്ങളെ തിരുത്തിക്കുറിച്ചാണ് യോ​ഗയിൽ ഷീജയുടെ ജൈത്രയാത്ര.

ആത്മീയതയ്ക്കപ്പുറം യോ​ഗയ്ക്ക് വിവിധ മാനങ്ങളുണ്ടെന്നത് സമൂഹത്തിന് പരിചയപ്പെടുത്തുകയെന്ന ഉദ്യമമാണ് ഷീജ ഏറ്റെടുത്തത്. എംഎസ്-സി യോ​ഗ, ഡിപ്ലോമ ഇൻ യോ​ഗ ട്രെയിനിങ്, നാഷണൽ റഫറി ടെസ്റ്റ് എന്നിവ പൂർത്തിയാക്കി. പിന്നീട് യോ​ഗ പരിശീലകയുടെ കുപ്പായമണിഞ്ഞു. നാഷണൽ, ഏഷ്യൻ യോ​ഗ റഫറിയുമാണ്. 49ാം സീനീയർ നാഷണൽ യോ​ഗ ചാമ്പ്യൻഷിപ്പിന്റെയും ഏക വനിത റഫറിയായിരുന്നു.

യോ​​ഗയിലൂടെ മാറ്റമുണ്ടായിട്ടുള്ള കുറെയധികം മനുഷ്യരെ പരിചയപ്പെടാൻ കഴിഞ്ഞിട്ടുണ്ടെന്ന് ഷീജ പറയുന്നു. പക്ഷാഘാതം വന്ന് ശരീരം തളർ‌ന്ന വ്യക്തിക്കുണ്ടായ മാറ്റമൊരു ഉദാഹരണമാണ്. യോ​ഗയിലേക്ക് കുറെയധികം വിദ്യാർഥികളെ എത്തിക്കാൻ കഴിഞ്ഞിട്ടുണ്ടെന്നതിന്റെ സന്തോഷമുണ്ട്, ഇനിയും കൂടുതൽ പേരിലേക്ക് എത്തിക്കണം. മുഖ്യമന്ത്രി പിണറായി വിജയന്റെ പിന്തുണ ഈ മേഖലയിൽ വളരെ പ്രശംസനീയമാണ്. സ്പോർട്സ് യോ​ഗ അം​ഗീകരിച്ച ഏക സംസ്ഥാനം കേരളമാണ്. സ്കൂൾ, കോളേജ് പാഠ്യപദ്ധതിയിലും യോ​ഗയിലും ഉൾപ്പെടുത്തിയത് നേട്ടമാണെന്ന് അവർ പറഞ്ഞു.

പ്ലസ്ടു വിദ്യാർഥിയായ മകൾ ആലിയ അസ്‍ലവും അമ്മയുടെ പാത പിന്തുടർന്ന് യോ​ഗ അഭ്യസിക്കുന്നുണ്ട്. ശനിയാഴ്ച ജിമ്മി ജോർജ്ജ് സ്റ്റേഡിയത്തിൽ കേരള സർവകലാശാലയും യോ​ഗ അസോസിയേഷൻ ഓഫ് കേരളയും ചേർന്ന് നടത്തുന്ന യോ​ഗദിനാചരണത്തിൽ ആലിയയുടെ യോ​ഗ ഡാൻസ് അവതരണമുണ്ട്. യോ​ഗ അസോസിയേഷൻ‌ ജോയിന്റ് സെക്രട്ടറി കൂടിയാണ് ഷീജ. കൂടെ സംസ്ഥാന യോ​ഗ ടീമിന്റെ കോച്ചും മാനേജരുമാണ്.