ശ്രീശങ്കറിന്​ വീണ്ടും സ്വർണം

അൽമാറ്റി (കസാഖ്​സ്ഥാൻ)

പരിക്ക്​ മാറിയുള്ള തിരിച്ചുവരവിൽ മലയാളി ചാട്ടക്കാരൻ എം ശ്രീശങ്കറിന്​ മൂന്നാം സ്വർണം. കസാഖ്​സ്ഥാനിൽ നടക്കുന്ന ക്വസനോവ്​ സ്​മാരക അത്​ലറ്റിക്​ മീറ്റിൽ പുരുഷന്മാരുടെ ലോങ്ജമ്പിൽ 7.94 മീറ്റർ താണ്ടിയാണ്​ നേട്ടം.

ഏഴ്​ താരങ്ങൾ അണിനിരന്ന മത്സരത്തിൽ ആദ്യ അവസരത്തിൽതന്നെ സ്വർണദൂരം കണ്ടെത്തി. ബാക്കിയുള്ള ചാട്ടങ്ങളിലും എട്ട്​ മീറ്റർ മറികടക്കാനായില്ല. 7.94 മീറ്റർ, 7.73, 7.58, 7.57, 7.80, 7.79 മീറ്റർ എന്നിങ്ങനെയാണ്​ ചാട്ടങ്ങൾ. ഫിലിപ്പെൻസിന്റെ ഉബാസ്​ ജാനറി 7.53 മീറ്ററോടെ വെള്ളി കരസ്ഥമാക്കി. ​ 7.48 മീറ്റർ ചാടിയ അസർബൈജാൻ താരം ബാബയേവ്​ നസീം മൂന്നാമതായി. തണുത്ത കാലാവസ്ഥ പ്രകടനത്തെ ബാധിച്ചതായി ശ്രീശങ്കറിന്റെ അഛനും പരിശീലകനുമായ എസ്​ മുരളി പറഞ്ഞു. ​ രണ്ട്​വർഷത്തെ ഇടവേളക്കുശേഷം കഴിഞ്ഞ മാസം പുണെയിൽ നടന്ന ഓപ്പൺമീറ്റിലാണ്​ ഇരുപത്താറുകാരൻ ആദ്യം ഇറങ്ങിയത്​. 8.05 മീറ്റർ മറികടന്നായിരുന്നു സ്വർണം. തുടർന്ന്​​ പോർച്ചുഗലിൽ നടന്ന മീറ്റിൽ 7.75 മീറ്റർ ചാടി ഒന്നാമതെത്തി. 2024 പാരിസ്​ ഒളിമ്പിക്​സിനുള്ള ഒരുക്കത്തിനിടയിലാണ്​ കാൽമുട്ടിന്​ പരിക്കേറ്റത്​. അടുത്തമാസം നടക്കുന്ന ലോക ചാമ്പ്യൻഷിപ്പിന്​ യോഗ്യത നേടുകയാണ്​ ലക്ഷ്യം. ഭുവനേശ്വറിൽ 10ന്​ നടക്കുന്ന കോണ്ടിനെന്റൽ ടൂറാണ്​ അടുത്ത മത്സരം. ​

ക്വസനോവ്​ ​ മീറ്റിൽ മറ്റൊരു മലയാളി അത്​ലീറ്റുകൂടി പങ്കെടുക്കുന്നുണ്ട്. ​ ട്രിപ്പിൾജമ്പിൽ അബ്​ദുള്ള അബൂബക്കർ ഇന്നിറങ്ങും. പത്ത്​ പേരാണ്​ മത്സരത്തിനുള്ളത്​.