ക്ലബ്ബ് ലോകകപ്പ്: പ്രീ ക്വാർട്ടർ പൂർണ്ണ ചിത്രം നാളെ അറിയാം, 16 ൽ നാലെണ്ണം ബ്രസീൽ ക്ലബ്

ഫിലഡൽഫിയ: ക്ലബ് ഫുട്ബോൾ ലോകകപ്പ് പ്രീക്വാർട്ടർ ടീമുകളുടെ പൂർണ്ണ ചിത്രം നാളെ വ്യക്തമാകും. ലോകത്തെ 32 ടീമുകൾ പങ്കെടുത്ത മത്സരത്തിൽ പ്രീക്വർട്ടർ ഉറപ്പിച്ച 16 ടീമുകളിൽ നാലെണ്ണം ബ്രസീലയൻ ക്ലബ്ബുകളാണ്. ​ഗ്രൂപ്പ് എയിൽ നിന്ന് പൽമിറാസും ​ഗ്രൂപ്പ് ബിയിൽ നിന്ന് ബൊട്ടാഫൊ​ഗോ, ​ഗ്രൂപ്പ് ഡിയിൽ നിന്ന് ഫ്‌ളമെംഗോയും ​ഗ്രൂപ്പ് എഫിൽ നിന്ന് ഫ്‌ളുമിനെസുമാണ് ഇടം നേടിയത്.

27ന് പുലർച്ചെ 12.30 ​ഗ്രൂപ്പ് ജിയിലെയും രാവിലെ 6.30 ​ഗ്രൂപ്പ് എച്ചിലെയും മത്സരങ്ങൾ പൂർത്തിയാവുന്നതോടെ ഗ്രൂപ്പ് മത്സരങ്ങള്‍ പൂര്‍ത്തിയാവും. നാളെ നടക്കുന്ന മത്സരമാണ് ഇരു ഗ്രൂപ്പിലെയും ജേതാവിനെ തെരഞ്ഞെടുക്കുക. ഗ്രൂപ്പ് ജിയിൽ ആറു പോയന്റുമായി ഒന്നും രണ്ടും സ്ഥാനത്തുള്ള ഇറ്റലിൻ ക്ലബ് യുവന്റുസും ഇം​ഗ്ലണ്ട് ക്ലബ് മാഞ്ചസ്റ്റർ സിറ്റിയും ഏറ്റുമുട്ടുമ്പോൾ ​ഗ്രൂപ്പ് എച്ചിൽ നാലു പോയന്റുമായി ഒന്നും രണ്ടും സ്ഥാനത്തുള്ള സ്‌പെയ്‌ൻ ക്ലബ് റയൽ മാഡ്രിഡും ഓസ്‌ട്രിയൻ ക്ലബ് ആർബി സാൽസ്‌ബർഗുമാണ് ഏറ്റുമുട്ടുന്നത്. ​ഗ്രൂപ്പ് ജിയിലെ ഒന്നാം സ്ഥാനക്കാർ ​ഗ്രൂപ്പ് എഫിലെ രണ്ടാം സ്ഥാനക്കാരുമായും ഗ്രൂപ്പ് എഫിലെ ഒന്നാം സ്ഥാനക്കാർ ഗ്രൂപ്പ് ജിയിലെ രണ്ടാം സ്ഥാനക്കാരുമായും മത്സരിക്കും. ​

ആദ്യ രണ്ട് കളിയും ജയിച്ചാണ് യുവന്റുസും മാഞ്ചസ്റ്റർ സിറ്റിയും അവസാന മത്സരത്തിൽ ഏറ്റുമുട്ടുന്നത്. റയലിനും ആർബി സാൽസ്‌ബർ​ഗിനും ഒരു ജയവും സമനിലയുമായാണ് മത്സരിക്കാനെത്തുന്നത്. അതേസമയം പരിക്കിൽ നിന്ന് മോചിതനായി പരിശീലനത്തിനെത്തിയെങ്കിലും സൂപ്പർ താരം കിലിയൻ എംബാപ്പെ റയലിനായി കളിക്കില്ലെന്നാണ് റിപ്പോർട്ട്. ടൂർണമെന്റിലും രണ്ട് മത്സരങ്ങളിലും താരം കളിച്ചിരുന്നില്ല.