നെയ്​മർ 
തിളങ്ങുന്നു ; പരിക്ക്​ 
അതിജീവിച്ച്​ 
സജീവം

സാവോപോളോ

നെയ്​മർ താളം വീണ്ടെടുക്കുന്നു. ബ്രസീൽ ഫുട്​ബോൾ ലീഗിൽ യുവെൻടുഡെയ്​ക്കെതിരെ സാന്റോസിനായി ഇരട്ടഗോൾ നേടി. കളി 3–1ന്​ നെയ്​മറും സംഘവും ജയിച്ചു. രണ്ടു​വർഷത്തിനുശേഷമാണ്​ ബ്രസീൽ മുന്നേറ്റക്കാരൻ ഒരു കളിയിൽ രണ്ടു​ഗോൾ നേടുന്നത്​. 2023 സെപ്തംബറിൽ ബൊളീവിയക്കെതിരെയായിരുന്നു ഇ‍ൗ നേട്ടം. സാന്റോസിനായി തുടർച്ചയായ അഞ്ചാംതവണ മുപ്പത്തിമൂന്നുകാരൻ കളത്തിലെത്തി. മൂന്നു​വർഷത്തിനുശേഷമാണ്​ നെയ്​മർ ഇത്രയും കളിയിൽ തുടർച്ചയായി ഇറങ്ങുന്നത്​. മുൻ സീസണുകളിൽ പരിക്ക്​ വില്ലനായിരുന്നു.

നെയ്​മറിന്റെ പ്രകടനം ദേശീയ ടീമിലേക്കുള്ള തിരിച്ചുവരവിനും ഉ‍ൗർജമായി. പുതിയ ബ്രസീൽ കോച്ച്​ കാർലോ ആൻസെലോട്ടിയുടെ സംഘം കളി കാണാൻ എത്തിയിരുന്നു. മത്സരത്തിൽ ഏറ്റവും കൂടുതൽ നീക്കങ്ങളും മുന്നേറ്റവും നടത്തിയത്​ നെയ്​മറാണ്​. ആറ്​ ഷോട്ടുകൾ പായിച്ചു. അഞ്ച്​ അവസരങ്ങളും സൃഷ്ടിച്ചു. 26 പാസുകൾ കൈമാറി. 17 തവണ എതിരാളിയെ മറികടന്ന്​ മുന്നേറുകയും ചെയ്​തു. ‘നന്നായി കളിക്കാനായതിലും ടീം ജയിച്ചതിലും സന്തോഷം’–മത്സരശേഷം സാന്റോസ്​ ക്യാപ്​റ്റൻ പറഞ്ഞു.

പുതിയ സീസണിൽ ഒമ്പത്​ കളിയിൽ മൂന്ന്​ ഗോളായി നെയ്​മറിന്​. 2023 ഒക്ടോബറിലാണ്​ അവസാനമായി ബ്രസീലിനായി കളിച്ചത്​. കാൽമുട്ടിന്​ പരിക്കേറ്റ്​ ഒരുവർഷം പുറത്തിരുന്നു. പിന്നീട്​ മറ്റു​പരിക്കുകളും തളർത്തി. സെപ്തംബർ 5ന്​ ചിലിയുമായും 10ന്​ ബൊളീവിയയുമായും ബ്രസീലിന്​ ലോകകപ്പ്​ യോഗ്യതാ മത്സരമുണ്ട്​. അടുത്തവർഷം നടക്കുന്ന ലോകകപ്പിന്​ ടീം നേരത്തെ യോഗ്യത നേടിയതാണ്​.