ഇരട്ട​ഗോളുമായി എംബാപ്പെ; സെൽറ്റ വിഗോയെ 3-2ന് വീഴിത്തി റയൽ

മാഡ്രിഡ്: സ്‌പാനിഷ്‌ ഫുട്‌ബോൾ ലീഗായ ലാലിഗയിൽ സെൽറ്റ വിഗോയെ 3-2ന് വീഴ്ത്തി റയൽ മാഡ്രിഡ്. സൂപ്പർ താരം കിലിയൻ എംബാപ്പെ രണ്ടു ​ഗോളുമായി തിളങ്ങി. മൂന്ന് ​ഗോളിന് പിറകിൽ നിന്ന ശേഷമാണ് സെൽറ്റ വിഗോ രണ്ടു ​ഗോൾ മടക്കിയത്.

സ്വന്തം തട്ടകമായ സാന്റിയാഗോ ബെർണബ്യൂവിൽ നടന്ന മത്സരത്തിന്റെ തുടക്കത്തിൽ തന്നെ റയൽ ലീഡ് നേടി. 33-ാം മിനിറ്റിൽ യുവതാരം ആർദ ഗൂലെറാണ് ടീമിനായി ഗോൾ കണ്ടെത്തിയത്. പിന്നാലെ 39-ാം മിനിറ്റിൽ എംബാപ്പെ ടീം ലീഡ് ഉയർത്തി. കളിയുടെ രണ്ടാം പകുതിയുടെ തുടക്കത്തിൽ 48-ാം മിനിറ്റിലും എംബാപ്പെ ഗോൾ നേടിയതോടെ റയൽ 3-0ന് മുന്നിലായി.

എന്നാൽ പിന്നീട് റയൽ പ്രതിരോധത്തെ മറികടന്ന് രണ്ടു ഗോളുകളാണ് സെൽറ്റ വിഗോ മടക്കിയത്. 69-ാം മിനിറ്റിൽ ഹാവി റോഡ്രിഗസും 76-ാം മിനിറ്റിൽ വില്യറ്റ്‌ സെഡ്‌ബെർഗുമാണ് ടീമിനായി ഗോൾ നേടിയത്. ജയത്തോടെ ലാലിഗയിൽ പട്ടികയിൽ ഒന്നാമതുള്ള ബാഴ്‌സലോണയുമായുള്ള നാല് പോയിന്റ് വ്യത്യാസം റയൽ നിലനിർത്തി. 34 മത്സരങ്ങളിൽ നിന്ന് ബാഴ്‌സയ്ക്ക് 79 പോയന്റും റയലിന് 75 പോയന്റുമാണുള്ളത്.

ലാലിഗ കിരീടം മാത്രമാണ്‌ ഇനി ഈ സീസണിലെ റയലിന്റെ പ്രതീക്ഷ. എന്നാല്‍ കിരീടം നേടണമെങ്കില്‍ റയലിന്‌ ബാഴ്‌സയെ മറികടക്കേണ്ടതുണ്ട്‌. മെയ് 11 ലാലി​ഗയിൽ ഇരുടീമുകളും ഏറ്റുമുട്ടും.