ലാ ലി​ഗയിൽ ബാഴ്സ മുന്നോട്ട്; അത്‌ലറ്റികോ മാഡ്രിഡിന് തോൽവി

ബാഴ്സലോണ: ലാ ലി​ഗയിൽ വിജയം തുടർന്ന് ബാഴ്സലോണ. ഇഞ്ചുറിടൈമിൽ നേടിയ ​ഗോളിലാണ് കറ്റാലൻ പട സെൽറ്റ വിഗോ​യെ 4-3ന് തകർത്തത്. 3-1ന് പിന്നിൽ നിന്ന ശേഷമാണ് ബാഴ്സ ഗംഭീര തിരിച്ചുവരവ് നടത്തിയത്. ഇതോടെ 32 മത്സരത്തിൽ നിന്ന് ബാഴ്സയ്ക്ക് 72 പോയന്റായി. രണ്ടാമതുള്ള റയൽ മാഡ്രിഡിന് 31 മത്സരത്തിൽ നിന്ന് 66 പോയന്റാണുള്ളത്.

കളിയുടെ തുടക്കത്തിൽ 12-ാം മിനിറ്റിൽ ഫെ​റാ​ൻ ടോ​റ​സിലൂടെ ബാഴ്സ ലീഡ് നേടി. എന്നാൽ 15-ാം മിനിറ്റിൽ ബോ​ർ​ജ ഇ​ഗ്ലേ​സി​യാ​സിലൂടെ സെൽറ്റ വിഗോ സമനില പിടിച്ചു. രണ്ടാം പകുതിയിൽ രണ്ടു ​ഗോളുകൾ കൂടി നേടി ബോ​ർ​ജ ഇ​ഗ്ലേ​സി​യാ​സ് (52’, 62’) ഹാട്രികുമായി തിളങ്ങിയതോടെ സെൽറ്റ 3-1ന് മുന്നിലായി. 64ാം മിനിറ്റിൽ ഡാ​നി​യ​ൽ ഒ​ൽ​മോയും 68-ാം മിനിറ്റിൽ റാഫിഞ്ഞയും ഗോൾ നേടി ബാഴ്സയെ ഒപ്പമെത്തിച്ചു. മത്സരം സ​മ​നി​ല​യാകുമെന്ന ഘട്ടത്തിൽ 90+8-ാം മിനിറ്റിൽ ല​ഭി​ച്ച പെ​നാ​ൽ​റ്റി റാ​ഫി​ഞ്ഞ ല​ക്ഷ്യ​ത്തി​ച്ചാണ് ബാഴ്സ തകർപ്പൻ ജയം നേടിയത്.

അതേസമയം ലാ ലി​ഗയിൽ തരംതാഴ്ത്തൽ ഭീഷണി നേരിടുന്ന ലാസ് പാൽമാസ് അത്ലറ്റികോ മാഡ്രിഡിനെ അട്ടിമറിച്ചു. കളിയുടെ അവസാന നിമിഷം 90+3-ാം മിനിറ്റിൽ ജാവി മുനോസ് നേടിയ ​ഗോളാണ് പാൽമാസിന് വിജയമൊരുക്കിയത്. തോൽവിയോടെ അത്ലറ്റികോ പോയന്റ് പട്ടികയിൽ ഒന്നാമതുള്ള ബാഴ്സയേക്കാൾ പത്ത് പോയിന്റ് പിറകിലായി.