യുവ ചെൽസി ; ഹാറ്റോ ടീമിൽ

ലണ്ടൻ

ക്ലബ്​ ഫുട്​ബോൾ ലോകകപ്പ്​ കിരീടത്തിനുപിന്നാലെ യുവതാരങ്ങളെ കൂടാരത്തിലെത്തിച്ച്​ ചെൽസി ഇംഗ്ലീഷ്​ പ്രീമിയർ ലീഗ്​ പുതിയ സീസണിന്​ ഒരുങ്ങുന്നു. പത്തൊമ്പതുകാരൻ ജോറെൽ ഹാറ്റോയാണ്​ ചെൽസിയുടെ പുതിയ ആയുധം. ഡച്ച്​ ക്ലബ്​ അയാക്​സിൽനിന്ന് ​ ഏകദേശം 430 കോടി രൂപ​ക്ക്​ ഹാറ്റോയെ കൂടാരത്തിലെത്തിക്കും. ഏഴ്​ വർഷത്തേക്കായിരിക്കും കരാർ.

ഇ‍ൗ താരകൈമാറ്റ ജാലകത്തിൽ ചെൽസിയിലെത്തിയ എട്ടാമത്തെ കളിക്കാരനാണ്​ ഡച്ചുകാരൻ. മറ്റൊരു ഡച്ചുകാരൻ സാവി സിമ്മൺസിനായും ശ്രമംനടത്തുന്നുണ്ട്​. പതിനാറാം വയസ്സിലാണ്​ ഹാറ്റോ അയാക്​സിനായി അരങ്ങേറിയത്​. 75 മത്സരങ്ങളിൽ ഇറങ്ങി. 2023ലായിരുന്നു പ്രതിരോധക്കാരന്റെ ദേശീയ കുപ്പായത്തിലെ അരങ്ങേറ്റം. ജാമി ഗിട്ടെൻസ്​, ജോയോ പെഡ്രോ, ലിയാം ഡെലാപ്​, മമദ‍ൗ സാർ, ഡാരിയോ എസുഗോ, എസ്​റ്റാവോ വില്ലിയൻ, കെൻഡ്രി പയേസ്​ എന്നിവരാണ്​ സീസണിന്​ മുന്നോടിയായി ചെൽസി കൂടാരത്തിലെത്തിച്ച താരങ്ങൾ.

ഇരുപത്തൊന്നുകാരൻ ഗിട്ടെൻസിനെ ജർമൻ ക്ലബ്​ ബൊറ‍ൂസിയ ഡോർട്ട്​മുണ്ടിൽനിന്നാണ്​ സ്വന്തമാക്കിയത്. വിങ്ങറാണ്​ ഇംഗ്ലീഷുകാരൻ. ക്ലബ്​ ലോകകപ്പിൽ മിന്നുന്ന കളി പുറത്തെടുത്ത പെഡ്രോ മുന്നേറ്റത്തിന്​ മൂർച്ച നൽകുന്നു. ബ്രൈറ്റണിലായിരുന്നു കഴിഞ്ഞ സീസണിൽ ബ്രസീലുകാരൻ. ഇരുപത്തിണ്ടുകാരൻ ഡെലാപും മുന്നേറ്റത്തിൽ മിന്നും. പത്തൊമ്പതുകാരൻ ഫ്രാൻസിന്റെ മമദ‍ൗ സാർ സെന്റർ ബാക്കാണ്​. ബ്രസീൽ ക്ലബ്​ പൽമെയ്​റാസിൽനിന്നെത്തിയ എസ്​റ്റാവോയാണ്​ മറ്റൊരു ശ്രദ്ധേയ താരം. പതിനെട്ടുകാരൻ വിങ്ങർ ക്ലബ്​ ലോകകപ്പിൽ പൽമെയ്​റാസിനായി തകർപ്പൻ കളി പുറത്തെടുത്തു. ക്രിസ്​റ്റഫർ എൻകുങ്കു, നിക്കോളാസ്​ ജാക്​സൺ എന്നിവർ അടുത്ത സീസണിൽ ചെൽസി സംഘത്തിലുണ്ടാകില്ല.