വീണ്ടും മെസി മാജിക്; അർജന്റീനയ്ക്ക് ഉജ്വല വിജയം

ബ്യൂണസ്‌ ഐറിസ്‌: സ്വന്തം മണ്ണിൽ, കാണികൾക്ക് മുന്നിൽ വീണ്ടും ലയണൽ മെസി മാജിക്. ലാറ്റിനമേരിക്കൻ ലോകകപ്പ്‌ ഫുട്‌ബോൾ യോഗ്യതാ റ‍ൗണ്ടിൽ ഇരട്ട ​ഗോളുമായി മെസി തിളങ്ങിയതോടെ ഇതിരില്ലാത്ത മൂന്ന് ​ഗോളിനാണ് അർജന്റീന, വെനസ്വേലയെ തകർത്തത്. ജന്മനാട്ടിലെ അവസാന മത്സരമാണ് മുപ്പത്തെട്ടുകാരൻ ആഘോഷമാക്കി മാറ്റിയത്.

ബ്യൂണസ്‌ ഐറിസിലെ മൊണുമെന്റൽ സ്‌റ്റേഡിയത്തിൽ നടന്ന മത്സരത്തിൽ 39-ാം മിനിറ്റിലാണ് ആദ്യ ​ഗോൾ പിറന്നത്. അൽവാരസ് ഒരുക്കി നൽകിയ പാസ് മെസി ഇടതുകാൽ കൊണ്ട് പോസ്റ്റിലെത്തിക്കുകയായിരുന്നു. 76-ാം മിനിറ്റിൽ ലൗട്ടാരോ മാർട്ടിനസിലൂടെ അർജന്റീന ഗോൾ ഇരട്ടിയാക്കി. മനോഹരമായ ഹെഡിലൂടെയായിരുന്നു ​ഗോൾ. പിന്നാലെ 80ാം മിനിറ്റിൽ മെസി രണ്ടാം ​ഗോളും നേടി. അൽമാഡയുടെ പാസിൽ നിന്നായിരുന്നു ഇത്തവണ ​ഗോൾ.

അടുത്ത വർഷം അരങ്ങേറുന്ന ലോകകപ്പിലെ അർജന്റീനയുടെ സ്വന്തംതട്ടകത്തിലെ അവസാന യോഗ്യതാ റ‍ൗണ്ട്‌ മത്സരം കാണാൻ 80,000 ത്തിലധികം ആരാധകരാണെത്തിയത്. അടുത്ത വർഷം ജൂണിൽ അമേരിക്കയിലാണ്‌ ലോകകപ്പ്‌. ഇതിന്‌ മുമ്പ്‌ നാട്ടിൽ അർജന്റീന കളിക്കുമോ എന്ന കാര്യത്തിൽ സംശയമാണ്‌.