ഗിൽകാലം

ഓവൽ: ഇന്ത്യൻ ക്രിക്കറ്റിൽ ഇനി ശുഭ്​മാൻ ഗില്ലിന്റെ കാലം. ക്യാപ്​റ്റനായുള്ള അരങ്ങേറ്റ പരമ്പരയിൽ എല്ലാ സംശയങ്ങൾക്കും വിമർശങ്ങൾക്കും മറുപടി നൽകി. രോഹിത്​ ശർമ സ്ഥാനമൊഴിഞ്ഞതോടെയാണ്​ ഇരുപത്തഞ്ചുകാരനെ ഇന്ത്യൻ ക്യാപ്​റ്റനാക്കിയത്​. വിരാട്​ കോഹ്​ലി, രോഹിത്​, ആർ അശ്വിൻ എന്നീ പരിചയസമ്പന്നർ വിരമിച്ചശേഷമുള്ള ആദ്യ പരമ്പരയായിരുന്നു. യുവനിരയെന്നതും കളിക്കാരുടെ പരിക്കും വെല്ലുവിളിയായിരുന്നു. വിദേശമണ്ണിൽ റണ്ണടിക്കാത്ത ബാറ്ററെന്ന മുൻവിധിയും.

അഞ്ച്​ മത്സര പരമ്പര അവസാനിച്ചപ്പോൾ അരങ്ങേറ്റ ക്യാപ്​റ്റനായുള്ള ഇന്ത്യക്കാരന്റെ മികച്ച പ്രകടനവുമായാണ്​ മടക്കം​. 10 ഇന്നിങ്​സിൽ ഒരു ഇരട്ട സെഞ്ചുറിയും മൂന്ന്​ സെഞ്ചുറിയും ഉൾപ്പെടെ 754 റൺ. ശരാശരി 75.40. ഉയർന്ന സ്​കോർ 269. പരമ്പരയുടെ താരമായും തെരഞ്ഞെടുക്കപ്പെട്ടു. ഇംഗ്ലണ്ട്​ കോച്ച്​ ബ്രണ്ടൻ മക്കല്ലമാണ്​ ഗില്ലിനെ പരമ്പരയുടെ താരമായി തെരഞ്ഞെടുത്തത്​. ഇംഗ്ലീഷ്​ ബാറ്റർ ഹാരി ബ്രൂക്കും ഇ‍ൗ പുരസ്​കാരം പങ്കിട്ടു. ഇന്ത്യൻ കോച്ച്​ ഗ‍ൗതം ഗംഭീറാണ്​ ബ്രൂക്കിനെ തെരഞ്ഞെടുത്തത്​.

ഇ‍ൗ പര്യടനത്തിലെ മികച്ച ബാറ്ററാകണമെന്ന ആഗ്രഹം ഗിൽ പരമ്പര​ക്കു​മുമ്പ്​ പങ്കുവച്ചിരുന്നു​. വലംകൈയൻ ബാറ്റർക്ക്​ അത്​ സാധിക്കാനായി. ടൂർണമെന്റിലെ മികച്ച റൺവേട്ടക്കാരനായെന്നുമാത്രമല്ല പ്രതിസന്ധികളെ ഫലപ്രദമായി നേരിടുകയും ചെയ്​തു. പേസ്​ നിരയിലെ സൂപ്പർ താരം ജസ്​പ്രീത്​ ബുമ്ര രണ്ട്​ കളിയിലും വിക്കറ്റ്​ കീപ്പർ ഋഷഭ്​ പന്ത്​ അവസാന ടെസ്റ്റിലും പുറത്തിരുന്നിട്ടും ടീമിനെ ചരിത്ര ജയത്തിലേക്ക്​ നയിച്ചു. ഓവലിൽ ജയം നേടുന്ന മൂന്നാമത്തെ ഇന്ത്യൻ ക്യാപ്​റ്റനാണ്​. അജിത്​ വഡേക്കർ (1971), വിരാട്​ കോഹ്​ലി (2021) എന്നിവരാണ്​ മുൻഗാമികൾ.