ബുമ്ര 
എത്ര 
ദൂരം ; ടെസ്റ്റിൽ തുടരുന്ന കാര്യത്തിൽ അവ്യക്തത

ലണ്ടൻ

ജസ്​പ്രീത്​ ബുമ്രയ്​ക്കുശേഷമുള്ള പേസ്​ ​നിരയെക്കുറിച്ച്​ ഇന്ത്യൻ ക്രിക്കറ്റ്​​ ടീം മാനേജ്​മെന്റ്​ ആലോചിച്ച്​ തുടങ്ങുന്നു. ബുമ്ര എത്രനാൾ ടെസ്​റ്റ്​ കളിക്കുമെന്ന കാര്യത്തിൽ ആശങ്ക തുടരുന്നതിനിടെയാണ്​ ഭാവി ബ‍ൗളർമാരെക്കുറിച്ചുള്ള ചർച്ചകൾ സജീവമാകുന്നത്​. ലോകത്തെ ഏറ്റവും മികച്ച പേസർമാരിലൊരാളായ മുപ്പത്തൊന്നുകാരന്​ പരിക്കാണ്​ വെല്ലുവിളി. ഇതിനകം രണ്ട്​ ശസ്ത്രക്രിയകൾ നടത്തേണ്ടിവന്നു. ഒന്നുകൂടി സംഭവിച്ചാൽ കളിജീവിതം അപകടത്തിലാകും. അതിനിടെ അടുത്ത മാസം നടക്കുന്ന ഏഷ്യാ കപ്പ്​ ട്വന്റി20യിൽ കളിക്കാൻ സാധ്യതയില്ലെന്നാണ്​ ബിസിസിഐ നൽകുന്ന സൂചന.

ഇംഗ്ലണ്ടിനെതിരായ അഞ്ച്​ മത്സര പരമ്പരയിൽ മൂന്നെണ്ണം മാത്രമേ കളിക്കുകയുള്ളൂവെന്ന്​ വ്യക്തമാക്കിയിരുന്നു. രണ്ടാം ടെസ്​റ്റും അവസാന ടെസ്​റ്റും കളിച്ചില്ല. മൂന്ന്​ മത്സരങ്ങളിലായി 119.4 ഓവർ എറിഞ്ഞ്​​ 14 വിക്കറ്റാണ്​ സ്വന്തമാക്കിയത്​. ഇതിൽ രണ്ടുതവണ അഞ്ച്​ വിക്കറ്റ്​ നേട്ടവും. പക്ഷേ, മാഞ്ചസ്റ്ററിൽ നടന്ന മൂന്നാം ടെസ്റ്റിൽ ഒരു ഇന്നിങ്​സിൽ 100 റണ്ണിൽ കൂടുതൽ വിട്ടുകൊടുക്കേണ്ടിവന്നു. കളി ജീവിതത്തിൽ ആദ്യമായാണ്​ ഇ‍ൗയൊരു അനുഭവം.

ടെസ്റ്റിൽ ആകെ 48 മത്സരങ്ങളിൽ 219 വിക്കറ്റാണ്​ സമ്പാദ്യം. ​ ഇനിയൊരിക്കലും തുടർച്ചയായ മൂന്ന്​ ടെസ്​റ്റിന്​ മുകളിൽ കളിക്കാൻ കഴിയില്ലെന്നായിരുന്നു സെലക്ഷൻ സമിതി ചെയർമാൻ അജിത്​ അഗാർക്കർ വ്യക്തമാക്കിയത്​. മുൻ താരങ്ങളായ അനിൽ കുംബ്ലെ, മുഹമ്മദ്​ കൈഫ്​, ഓസ്​ട്രേലിയൻ ടീം മുൻ പേസർ ഗ്ലെൻ മക്​ഗ്രാത്ത്​ എന്നിവരും ഇതേ അഭിപ്രായവുമായി രംഗത്തുവന്നിരുന്നു.

സെപ്​തംബറിലെ ഏഷ്യാ കപ്പ്​ ഒഴിവാക്കിയാൽ പിന്നീട്​ വരുന്നത്​ വെസ്​റ്റിൻഡീസുമായുള്ള ടെസ്റ്റ്​​ പരമ്പരയാണ്​. ഇതിൽ കളിക്കാനാണ്​ സാധ്യത. ഒക്​ടോബർ രണ്ടിനാണ്​ ആദ്യ കളി. രണ്ട്​ മത്സരമാണ്​ പരമ്പരയിൽ. പിന്നാലെ നവംബറിൽ ദക്ഷിണാഫ്രിക്കയുമായി രണ്ട്​ ടെസ്റ്റ്​​ കളിക്കും. ജനുവരിയിൽ ന്യൂസിലൻഡുമായുള്ള ടെസ്റ്റുണ്ട്​. ശേഷം ട്വന്റി20 ലോകകപ്പും. ഇത്രയും മത്സരങ്ങളിൽ കളിപ്പിക്കാനാകുമോ എന്നതാണ്​ നിലവിലെ ആശങ്ക.

അതേസമയം, ബുമ്രയുടെ അഭാവത്തിൽ ഇന്ത്യൻ പേസ്​ നിരയെ നയിക്കുന്ന മുഹമ്മദ്​ സിറാജിനും വിശ്രമം നൽകണമെന്ന ആവശ്യം ഉയരുന്നുണ്ട്​. ഇംഗ്ലണ്ടുമായുള്ള പരമ്പരയിൽ അഞ്ച്​ കളിയിലും ഇറങ്ങി. 155.2 ഓവർ ആകെ എറിഞ്ഞു. രണ്ടാമതുള്ള ഇംഗ്ലീഷ്​ ക്യാപ്​റ്റൻ ബെൻ സ്​റ്റോക്​സ്​ എറിഞ്ഞത്​ 140 ഓവറാണ്​. 18 വിക്കറ്റുമായി ഒന്നാമതാണ്​ സിറാജ്​. ഇ‍ൗ വർഷം ഇന്ത്യക്കായി കൂടുതൽ പന്തെറിഞ്ഞതും മുപ്പത്തൊന്നുകാരനാണ്​.

ഇശാന്ത്​ ശർമ, മുഹമ്മദ്​ ഷമി, ഉമേഷ്​ യാദവ്​, ബുമ്ര, സിറാജ്​ എന്നിവരുള്ള പേസ്​ നിരയുടെ കാലത്തായിരുന്നു ഇന്ത്യയുടെ മികച്ച പ്രകടനം കണ്ടത്​. അതിൽ ബുമ്രയും സിറാജും മാത്രമാണ്​ ശേഷിക്കുന്നത്​. ആകാശ്​ ദീപും പ്രസിദ്ധ്​ കൃഷ്​ണയുമാണ്​ പുതുതായെത്തിയത്​. പ്രസിദ്ധിന്​ മികവ്​ പൂർണമായി പ്രയോജനപ്പെടുത്താൻ ഇതുവരെ കഴിഞ്ഞിട്ടില്ല. അൻഷുൽ കാംബോജ്​, അർഷ്​ദീപ്​ സിങ്​, ഹർഷിത്​ റാണ തുടങ്ങിയ നിര ബുമ്രയ്​ക്ക്​ പകരമാകുമോ എന്ന കാര്യത്തിൽ സംശയമുണ്ട്​.