മൂർച്ച കുറയുമോ ; ഇന്ത്യ x ഇംഗ്ലണ്ട്​ അവസാന ടെസ്​റ്റ്​ ഇന്നുമുതൽ

ഓവൽ

കൊണ്ടും കൊടുത്തും മുന്നേറിയ ടെസ്​റ്റ്​ ക്രിക്കറ്റ്​ പരമ്പരയുടെ അവസാന അധ്യായം ഇന്നുമുതൽ​. ചൂടൻ പോരാട്ടങ്ങളുടെ തുടർച്ച പ്രതീക്ഷിക്കാം​. 2–1ന്​ ഇംഗ്ലണ്ടാണ്​ മുന്നിൽ. ഇന്ത്യക്ക്​​ ജയിച്ചാൽ 2–2ന്​ ഒപ്പമെത്തി അവസാനിപ്പിക്കാം. മറിച്ചായാൽ പരമ്പര തോൽവി.

പേസർമാരുടെ വിളനിലമായ ഓവലിൽ ജസ്​പ്രീത്​ ബുമ്രയുടെ അഭാവം മൂർച്ച കുറയ്​ക്കുമോ എന്ന ആശങ്ക ഇന്ത്യക്കുണ്ട്​. വിക്കറ്റ്​ കീപ്പർ ഋഷഭ്​ പന്തും ടീമിലില്ല. മറുവശത്ത്​ ക്യാപ്​റ്റൻ ബെൻ സ്​റ്റോക്​സ്​ കളിക്കാത്തത്​ ഇംഗ്ലണ്ടിനും തിരിച്ചടിയാണ്​. വേഗംകൊണ്ട്​ വിരട്ടുന്ന ജോഫ്ര ആർച്ചെറും കളിക്കുന്നില്ല.

എല്ലാ മേഖലയിലും ഒരുപോലെ ശോഭിക്കുന്ന സ്​റ്റോക്​സിന്റെ അഭാവം ഇന്ത്യക്ക്​ കളിയിൽ മുൻതൂക്കം നൽകുമെന്നാണ്​ വിദഗ്​ധരുടെ അഭിപ്രായം.

അതേസമയം, മാഞ്ചസ്​റ്റർ ടെസ്​റ്റിൽ പൊരുതി നേടിയ സമനില ഇന്ത്യൻ ടീമിന്റെ മനോഭാവം മാറ്റിയിട്ടുണ്ട്​. തുടർന്നുണ്ടായ വിവാദങ്ങളും കളിയുടെ അന്തരീക്ഷത്തെ ചൂടുപിടിപ്പിച്ചു. രണ്ട്​ കളി തോറ്റെങ്കിലും പ്രകടനത്തിൽ ഇന്ത്യക്ക്​ നിരാശപ്പെടാനില്ല.

പതിനൊന്ന്​ സെഞ്ചുറികളാണ്​ ഇന്ത്യൻ ബാറ്റർമാരുടെ പേരിൽ. റണ്ണടിക്കാരിൽ ആദ്യ നാലു​പേരും ഇന്ത്യക്കാരാണ്​. ക്യാപ്​റ്റൻ ശുഭ്​മാൻ ഗിൽ മൂന്ന്​ സെഞ്ചുറികൾ ഉൾപ്പെടെ 722 റണ്ണുമായി മുന്നിലുണ്ട്​. മറുവശത്ത്​ ഇംഗ്ലീഷുകാർ ആകെ ഏഴ്​ സെഞ്ചുറികളാണ്​ നേടിയത്​.

ബ‍ൗളർമാരുടെ പട്ടികയിൽ 17 വിക്കറ്റുമായി സ്​റ്റോക്​സാണ്​ ഒന്നാമത്​. 14 വിക്കറ്റുള്ള ബുമ്ര രണ്ടാമത്​ നിൽക്കുന്നു. മുഹമ്മദ്​ സിറാജിനും 14 വിക്കറ്റുണ്ട്​. 11 വിക്കറ്റുള്ള ആകാശ്​ ദീപാണ്​ നാലാമത്​.

ബുമ്രയ്​ക്ക്​ പകരം​ ആകാശ്​ ദീപ്​ കളിച്ചേക്കും. അൻഷുൽ കാംബോജിന്​ പകരം പ്രസിദ്ധ്​ കൃഷ്​ണയും ഇറങ്ങിയേക്കും. സ്​പിന്നർ കുൽദീപ്​ യാദവിന്​ അവസരം കിട്ടുമോ എന്ന്​ കണ്ടറിയണം. കുൽദീപ്​ കളിച്ചാൽ ശാർദുൽ ഠാക്കൂർ പുറത്തിരിക്കും. ഇടംകൈയൻ പേസർ അർഷ്​ദീപ്​ സിങ്ങും പട്ടികയിലുണ്ട്​. വിക്കറ്റ്​ കീപ്പർ ധ്രുവ്​ ജുറെലായിരിക്കും.

ഇന്ത്യൻ ടീം: 
യശസ്വി ജയ്​സ്വാൾ, കെ എൽ രാഹുൽ, ബി സായ്​ സുദർശൻ, ശുഭ്​മാൻ ഗിൽ, വാഷിങ്​ടൺ സുന്ദർ, രവീന്ദ്ര ജഡേജ, ധ്രുവ്​ ജുറെൽ, ശാർദുൽ ഠാക്കൂർ/കുൽദീപ്​ യാദവ്​/അർഷ്​ദീപ്​ സിങ്​, ആകാശ്​ ദീപ്​, പ്രസിദ്ധ്​ കൃഷ്​ണ, മുഹമ്മദ്​ സിറാജ്​.

ഇംഗ്ലണ്ട്​ ടീം: സാക്​​ ക്രോളി, ബെൻ ഡക്കെറ്റ്​, ഒല്ലീ പോപ്​, ജോ റൂട്ട്​, ഹാരി ബ്രൂക്ക്​, ജേക്കബ്​ ബെതൽ‍, ജാമി സ്​മിത്ത്​, ക്രിസ്​ വോക്​സ്​, ഗസ്​ അറ്റ്​കിൻസൺ, ജാമി ഒവർടൺ‍, ജോഷ്​ ടങ്​.

പരിക്ക് : സ്​റ്റോക്​സ്​ കളിക്കില്ല

ഇന്ത്യയുമായുള്ള അഞ്ചാം ക്രിക്കറ്റ്​ ടെസ്​റ്റിന്​ ഇറങ്ങുന്ന ഇംഗ്ലണ്ടിന്​ ക്യാപ്​റ്റൻ ബെൻ സ്​റ്റോക്​സിന്റെ സേവനം ലഭിക്കില്ല. തോളിനേറ്റ പരിക്കുകാരണം ഓൾ റ‍ൗണ്ടർ പിന്മാറി. അവസാന രണ്ട്​ മത്സരങ്ങളിലും സ്​റ്റോക്​സായിരുന്നു മാൻ ഓഫ്​ ദി മാച്ച്​. ഒല്ലീ പോപ്പായിരിക്കും പകരം നായകൻ.

ആകെ നാല്​​ മാറ്റങ്ങളാണ്​ ടീമിൽ. ജോഫ്ര ആർച്ചെർ, ബ്രൈഡൻ കാർസീ, ലിയാം ഡോസൺ എന്നിവർ ഇറങ്ങില്ല. പകരം ജേക്കബ്​ ബെതൽ, ഗസ്​ അറ്റ്​കിൻസൺ, ജാമി ഓവർട്ടൺ, ജോഷ്​ ടങ്​ എന്നിവർ കളിക്കും. ആർച്ചെർക്കും കാർസീക്കും വിശ്രമം അനുവദിക്കുകയായിരുന്നു. ക്രിസ്​ വോക്​സിനായിരിക്കും പേസ്​ നിരയുടെ ചുമതല.

നാലാം ടെസ്​റ്റിന്റെ നാലാംദിനം സ്​റ്റോക്​സിന്​ പന്തെറിയാൻ കഴിഞ്ഞിരുന്നില്ല. അഞ്ചാംദിനം വേദനസഹിച്ചും പന്തെറിയുകയായിരുന്നു. അവസാന കളിയിൽ സ്​പെഷ്യലിസ്​റ്റ്​ ബാറ്ററായി കളിക്കാമെന്നായിരുന്നു കണക്കുകൂട്ടൽ. എന്നാൽ, പരിശീലകൻ ബ്രണ്ടൻ മക്കല്ലം ഇക്കാര്യത്തിൽ വിസമ്മതം പ്രകടിപ്പിച്ചു. മെഡിക്കൽ സംഘവും അനുമതി നൽകിയില്ല. പതിനേഴ്​ വിക്കറ്റുമായി പട്ടികയിൽ ഒന്നാമതാണ്​ സ്​റ്റോക്​സ്​. ഏഴ്​ ഇന്നിങ്​സിൽ 304 റണ്ണും നേടി.