ആര് ജയിക്കും

ഓവൽ

ഹാരി ബ്രൂക്കും ജോ റൂട്ടും തൊടുത്ത റൺശരങ്ങളിൽ ഇന്ത്യ പുളഞ്ഞു. അഞ്ചാം ക്രിക്കറ്റ്​ ടെസ്​റ്റിൽ 374 റൺ ലക്ഷ്യവുമായി ഇറങ്ങിയ ഇംഗ്ലണ്ട്​ മഴകാരണം നാലാംദിനം കളി അവസാനിപ്പിക്കുമ്പോൾ ആറ്​​ വിക്കറ്റ്​ നഷ്ടത്തിൽ 339 റണ്ണെന്ന നിലയിലാണ്​. നാല്​ വിക്കറ്റ്​ ശേഷിക്കെ 35 റൺ കൂടി മതി. അവസാന ദിനമായ ഇന്ന്​ ശേഷിച്ച നാല്​ വിക്കറ്റ്​ നേടിയാൽ ഇന്ത്യക്ക്​ പരമ്പരയിൽ ഒപ്പമെത്താം.

സ്​കോർ: ഇന്ത്യ 224, 396; ഇംഗ്ലണ്ട്​ 247, 339/6

ഓവലിലെ എക്കാലത്തെയും മികച്ച ലക്ഷ്യത്തിലേക്കാണ്​ ഇംഗ്ലണ്ട്​ ബാറ്റുമായി ഇറങ്ങിയത്​. ബ്രൂക്കിന്റെയും (98 പന്തിൽ 111) റൂട്ടിന്റെയും (152 പന്തിൽ 105) സെഞ്ചുറികളാണ്​ ജയ പ്രതീക്ഷയിലായിരുന്ന ഇന്ത്യയെ തളർത്തിക്കളഞ്ഞത്​.

നാലാംദിനം ഒരു വിക്കറ്റ്​ നഷ്ടത്തിൽ 50 റണ്ണെന്ന നിലയിൽ ഇംഗ്ലീഷുകാർ തുടങ്ങി. ബെൻ ഡക്കറ്റിനെയും (54) ക്യാപ്​റ്റൻ ഒല്ലീ പോപ്പിനെയും (27) പുറത്താക്കി ഇന്ത്യ കളി പിടിക്കുമെന്ന്​ കരുതിയെങ്കിലും ബ്രൂക്കും റൂട്ടും തടഞ്ഞു. ബ്രൂക്ക്​ 98 പന്തിൽ 111 റണ്ണാണ്​ അടിച്ചുകൂട്ടിയത്​. ടെസ്​റ്റിലെ 39–ാം സെഞ്ചുറി പൂർത്തിയാക്കിയ റൂട്ട്​ 152 പന്തിൽ 105 റണ്ണെടുത്തു. നാലാം വിക്കറ്റിൽ ഇ‍ൗ സഖ്യം 211 പന്ത്​ നേരിട്ട്​ 195 റണ്ണാണ്​ നേടിയത്​. മൂന്നിന്​ 106 റണ്ണെന്ന നിലയിലാണ്​ ഇരുവരും ഒത്തുചേർന്നത്​. രണ്ട്​ സിക്​സറും 14 ഫോറുമായിരുന്നു ബ്രൂക്കിന്റെ ഇന്നിങ്​സിൽ. റൂട്ട്​ 12 ബ‍ൗണ്ടറികൾ നേടി.

സ്​കോർ 19ൽ നിൽക്കെ ബ്രൂക്ക്​ നൽകിയ അവസരം മുഹമ്മദ്​ സിറാജ്​ പാഴാക്കിയത്​ ഇന്ത്യക്ക്​ കനത്ത തിരിച്ചടി നൽകി. പ്രസിദ്ധ്​ കൃഷ്​ണയുടെ ഷോർട്ട്​ പിച്ച്​ പന്ത്​ സിക്​സർ പായിക്കാനുള്ള ശ്രമത്തിലായിരുന്നു ഇംഗ്ലീഷ്​ ബാറ്റർ. എന്നാൽ വരയ്​ക്കരികെ നിന്ന സിറാജിന്റെ കൈകളിൽ പന്തൊതുങ്ങി. പക്ഷേ, പന്ത്​ കൈപ്പിടിയിലാക്കി രണ്ടടി പിന്നോട്ട്​ വച്ച്​ ഇന്ത്യൻ പേസർ വരയിൽ ചവുട്ടി. ഇതോടെ സിക്​സറായി. ബ്രൂക്ക്​ പിന്നെ തിരിഞ്ഞു നോക്കിയില്ല. ആ ഓവറിൽ പതിനാറ്​ റണ്ണാണ്​ അടിച്ചുകൂട്ടിയത്​. അതിവേഗത്തിലായിരുന്നു റണ്ണൊഴുക്ക്​. റൂട്ട്​ മികച്ച പങ്കാളിയായി.

സിറാജും പ്രസിദ്ധും ആകാശ്​ ദീപും ഉൾപ്പെട്ട ഇന്ത്യയുടെ മൂന്നംഗ പേസ്​ നിര എറിഞ്ഞു തളർന്നു. ചായക്ക്​ പിരിയുന്നതിന്​ തൊട്ടുമുമ്പ്​ ബൂക്കിനെ ആകാശ്​ പുറത്താക്കി. പിന്നാലെ റൂട്ടിനെയും ജേക്കബ്​ ബെതലിനെയും (5)മടക്കി പ്രസിദ്ധ്​ ഇന്ത്യക്ക്​ നേരിയ പ്രതീക്ഷ നൽകി. അപ്പോഴേക്കും മഴയെത്തി. കളി നിർത്തിവച്ചു. രണ്ട്​ റണ്ണുമായി ജാമി സ്​മിത്തും റണ്ണൊന്നുമെടുക്കാതെ ജാമി ഒവർട്ടണുമാണ്​ ക്രീസിൽ. തുടർച്ചയായി മൂന്ന്​ വിക്കറ്റുകൾ നേടി ഇന്ത്യ കളിയിലേക്ക്​ തിരിച്ചുവരുമ്പോഴായിരുന്നു മഴയുടെ രംഗപ്രവേശം.

ഇന്ത്യക്കായി പ്രസിദ്ധ്​ മൂന്നും സിറാജ്​ രണ്ടും വിക്കറ്റ്​ വീഴ്​ത്തി. പരമ്പരയിൽ 2–1ന്​ ഇംഗ്ലണ്ട്​ മുന്നിലാണ്​.