മഴയിൽ തകർച്ച ; 204/6

ഓവൽ

മഴക്കളയിൽ ഇന്ത്യക്ക്​ ബാറ്റിങ്​ തകർച്ച. ഇംഗ്ലണ്ടിനെതിരായ അഞ്ചാം ക്രിക്കറ്റ്​ ടെസ്​റ്റിന്റെ ആദ്യദിനം ഭൂരിഭാഗവും മഴ കൊണ്ടുപോയപ്പോൾ ഇന്ത്യൻ ബാറ്റിങ്​ നിരയും തണുത്തുറഞ്ഞു. ആറ് വിക്കറ്റ്​​ നഷ്ടത്തിൽ 204 റണ്ണെന്ന നിലയിലാണ്​. 52 റണ്ണോടെ കരുൺ നായരും 19 റണ്ണുമായി വാഷിങ്ടൺ സുന്ദറുമാണ് ​ ക്രീസിൽ.

തുടർച്ചയായ അഞ്ചാം ടെസ്​റ്റിലും ഇന്ത്യൻ ക്യാപ്​റ്റൻ ശുഭ്​മാൻ ഗില്ലിന്​ ടോസ്​ കിട്ടിയില്ല. ബെൻ സ്​റ്റോക്​സിന്​ പകരം ഇംഗ്ലണ്ടിനെ നയിച്ച ഒല്ലീ പോപ്പ്​ ഇന്ത്യയെ ബാറ്റിങ്ങിന്​ അയക്കുകയായിരുന്നു. മഴകാരണം തുടക്കം വൈകി. ഓവലിലെ പച്ചപ്പുള്ള പിച്ചിൽ ഇംഗ്ലീഷ്​ പേസർമാർ അപകടകാരികളായപ്പോൾ ഇന്ത്യൻ ഓപ്പണർമാരായ കെ എൽ രാഹുലും യശസ്വി ജയ്​സ്വാളും താളം കണ്ടെത്താൻ ബുദ്ധിമുട്ടുകയായിരുന്നു. നാലാം ഓവറിൽതന്നെ ജയ്​സ്വാൾ പുറത്ത്​. രണ്ട്​ റൺ മാത്രമെടുത്ത ഇടംകൈയനെ ഗസ്​ അറ്റ്​കിൻസൺ വിക്കറ്റിന്​ മുന്നിൽ കുരുക്കുകയായിരുന്നു. രാഹുലും സായ്​ സുദർശനും ശ്രദ്ധാപൂർവമാണ്​ ബാറ്റ്​ വീശിയത്​. പക്ഷേ, ഉച്ചഭക്ഷണത്തിന്​ പിരിയുന്നതിന്​ തൊട്ടുമുമ്പ്​ രാഹുലിന്റെ (14) പ്രതിരോധം ക്രിസ്​ വോക്​സ്​ ഭേദിച്ചു.

പരമ്പരയിലെ റണ്ണടിക്കാരൻ ഗില്ലും സുദർശനും ചേർന്നപ്പോൾ റണ്ണൊഴുക്കിന്​ വേഗംകൂടി. ഗിൽ അനായാസമാണ്​ ഇംഗ്ലീഷ്​ ബ‍ൗളർമാരെ നേരിട്ടത്​. എന്നാൽ അറ്റ്​കിൻസണിന്റെ പന്തിൽ അനാവശ്യ റണ്ണിനോടിയ ക്യാപ്​റ്റന്​ പിഴച്ചു. ക്രീസ്​ വിട്ട്​ ഓടിയ ഗിൽ തിരിച്ചെത്തുംമുമ്പ്​ അറ്റ്​കിൻസൺ സ്​റ്റമ്പ്​ തകർത്തു. ഇന്ത്യ മൂന്നിന്​ 83ലേക്ക്​ തകർന്നു. 21 റണ്ണായിരുന്നു ഗില്ലിന്റെ സമ്പാദ്യം. ഇതിനിടെ മഴകാരണം കളി വീണ്ടും തടസ്സപ്പെട്ടു.

ഇടവേളയ്​ക്കുശേഷം ടീമിൽ തിരിച്ചെത്തിയ കരുൺ നായർ തുടക്കത്തിൽ താളം കണ്ടെത്താൻ ബുദ്ധിമുട്ടി. സുദർശന്റെ ഏകാഗ്രതയും നഷ്ടപ്പെട്ടു. 38 റണ്ണെടുത്ത ഇടംകൈയനെ ജോഷ്​ ടങ്​ വിക്കറ്റ്​ കീപ്പർ ജാമി സ്​മിത്തിന്റെ കൈയിലെത്തിച്ചു. മാഞ്ചസ്​റ്ററിൽ സെഞ്ചുറിയുമായി തിളങ്ങിയ രവീന്ദ്ര ജഡേജയ്​ക്കും (9) ടങ്ങിന്റെ പന്തിൽ പിടിച്ചുനിൽക്കാനായില്ല. ധ്രുവ് ജുറേൽ 19 റണ്ണെടുത്ത് പുറത്തായി.

ഏഴാം വിക്കറ്റിൽ കരുണും സുന്ദറും നടത്തിയ ചെറുത്തുനിൽപ്പാണ് ഇന്ത്യയെ 200 കടത്തിയത്. ഈ സഖ്യം 51 റണ്ണെടുത്തു.