ദോഫാർ സന്ദർശകർക്ക് മുന്നറിയിപ്പ് നൽകി പൈതൃക ടൂറിസം മന്ത്രാലയം സുരക്ഷാ

മസ്‌കത്ത്‌ : മേഖലയിലെ കാലാവസ്ഥാ വ്യതിയാനം കാരണം കൂടുതൽ ജാഗ്രത പാലിക്കണമെന്ന് ദോഫാറിൽ എത്തുന്ന വിനോദ സഞ്ചാരികൾക്കും ടൂറിസം സ്ഥാപനങ്ങൾക്കും പൈതൃക ടൂറിസം മന്ത്രാലയം സുരക്ഷാ മുന്നറിയിപ്പ് നൽകി. പൊതു സുരക്ഷാ നടപടിക്രമങ്ങൾ പാലിക്കേണ്ടതിന്റെ പ്രാധാന്യം മന്ത്രാലയം മുന്നറിയിപ്പിൽ ഊന്നിപ്പറഞ്ഞു. കഴിഞ്ഞ ദിവസം ദോഫാർ ഗവർണറേറ്റിലെ മിർബത്തിലെ വിലായത്തിൽ ഉണ്ടായ ഒരു അപകടത്തിൽ പർവതാരോഹണ വിനോദസഞ്ചാരി മരിച്ചിരുന്നു.

ജബൽ സംഹാനിൽ കുത്തനെയുള്ള ഒരു ചരിവിൽ കയറാൻ ശ്രമിക്കുന്നതിനിടെ വിനോദസഞ്ചാരി വഴുതി വീണതിനെത്തുടർന്നായിരുന്നു അപകടം. സിവിൽ ഡിഫൻസ് ആൻഡ് ആംബുലൻസ് അതോറിറ്റിയുടെ രക്ഷാപ്രവർത്തനവും ആംബുലൻസ് സംഘങ്ങളും പ്രാദേശിക പൗരന്മാരുടെ സഹായത്തോടെ സംഭവസ്ഥലത്ത് എത്തി. വീഴ്ചയിൽ ഗുരുതരമായ പരിക്കുകൾ ഏറ്റ സഞ്ചാരി സംഭവസ്ഥലത്ത് വച്ചുതന്നെ മരിച്ചു. നിലവിലുള്ള കാലാവസ്ഥയെ അടിസ്ഥാനമാക്കി എല്ലാ വിനോദസഞ്ചാര സ്ഥാപനങ്ങൾക്കും ജാഗ്രത പാലിക്കേണ്ടതിന്റെയും പൊതു സുരക്ഷാ നടപടിക്രമങ്ങൾ പാലിക്കേണ്ടതിന്റെയും ആവശ്യകത പൈതൃക ടൂറിസം മന്ത്രാലയം മുന്നറിയിപ്പിൽ പറഞ്ഞു.