ഖരീഫ് സീസൺ; ഒരുക്കം അവലോകനം ചെയ്ത്‌ ദോഫാർ ഗവർണറേറ്റ്

മസ്‌കത്ത്‌ :ജൂൺ 21 മുതൽ സെപ്തംബർ 20 വരെ നീണ്ടുനിൽക്കുന്ന ഈ വർഷത്തെ ഖരീഫ് സീസണിന്റെ ഒരുക്കങ്ങൾ അവലോകനം ചെയ്ത്‌ ദോഫാർ ഗവർണറേറ്റ്. സലാലയിലെ മില്ലേനിയം റിസോർട്ടിൽ നടന്ന യോഗത്തിൽ ദോഫാർ ഗവർണർ സയ്യിദ് മർവാൻ ബിൻ തുർക്കി അൽ സെയ്ദ് അധ്യക്ഷനായി. പൈതൃക, ടൂറിസം മന്ത്രി സലിം ബിൻ മുഹമ്മദ് അൽ മഹ്‌റൂഖി, ദോഫാർ മുനിസിപ്പാലിറ്റി ചെയർമാൻ ഡോ. അഹമ്മദ് ബിൻ മൊഹ്‌സിൻ അൽ ഗസാനി എന്നിവരുടെ സാന്നിധ്യത്തിലായിരുന്നു യോഗം. ഗവർണറേറ്റിലെ സർക്കാർ, സ്വകാര്യ മേഖല സ്ഥാപനങ്ങളുടെ സന്നദ്ധത യോഗം വിലയിരുത്തി.

വിജയകരവും മാതൃകാപരവുമായ ഖരീഫ് സീസൺ കൈവരിക്കുന്നതിന് തങ്ങളുടെ അധികാരപരിധിയിലുള്ള എല്ലാ പ്രസക്ത സ്ഥാപനങ്ങളുടെയും തയ്യാറെടുപ്പ് ഉറപ്പാക്കുമെന്ന്‌ ഗവർണർ പറഞ്ഞു. സീസണിന്റെ വിജയത്തിനായി യോജിച്ച ശ്രമങ്ങളുടെ പ്രാധാന്യം വേണമെന്നും അദ്ദേഹം വ്യക്തമാക്കി. ദോഫാർ മുനിസിപ്പാലിറ്റി അതിന്റെ പരിധിയിലുള്ള എല്ലാ മേഖലയിലെയും സേവനം മെച്ചപ്പെടുത്താനുള്ള പദ്ധതിയും സന്നദ്ധതയും വിശദീകരിക്കുന്ന ദൃശ്യ പ്രദർശനം അവതരിപ്പിച്ചു. മുൻ സീസണിലെ പ്രകടനത്തിന്റെ വിലയിരുത്തൽ, ഗതാഗത മാനേജ്മെന്റ് പദ്ധതികൾ, പരിശോധന, മേൽനോട്ട നടപടികൾ, മറ്റ് സ്ഥാപനങ്ങളുമായുള്ള ഏകോപനം, ആന്തരിക റോഡ് അവസ്ഥകൾ, വിവിധ വിലായത്തുകളിലുടനീളം ടൂറിസ്റ്റ് സീസണിനൊപ്പം പരിപാടികളും പ്രവർത്തനങ്ങളും നടത്തുന്നതിന് നിർദ്ദിഷ്ട സ്ഥലങ്ങളുടെ സന്നദ്ധത എന്നിവ ഇതിൽ ഉൾപ്പെടുന്നു.

വിനോദസഞ്ചാരികളുടെ വരവ് നിയന്ത്രിക്കുന്നതിലും ഉയർന്ന ജനസാന്ദ്രതയുള്ള പ്രദേശങ്ങളിൽ സുഗമമായ ഗതാഗതം ഉറപ്പാക്കുന്നതിലും സുരക്ഷാ ചെക്ക്‌പോസ്റ്റുകൾ ഒരുക്കുന്നതിലും രക്ഷാപ്രവർത്തനങ്ങളുടെ രൂപരേഖ തയ്യാറാക്കുന്നതിലും കേന്ദ്രീകരിച്ച്‌ ദോഫാർ ഗവർണറേറ്റ് പൊലീസ് കമാൻഡ് ഖരീഫ് സീസണിനായുള്ള പദ്ധതി അവതരിപ്പിച്ചു. ഗവർണറേറ്റിലെ ഡയറക്ടറേറ്റ് ജനറൽ ഓഫ് ഇൻഫർമേഷൻ, ഖരീഫ് സീസണിൽ മാധ്യമ പരിപാടികൾ സംപ്രേഷണം ചെയ്യാനുള്ള സമഗ്ര മാധ്യമ പദ്ധതി അവതരിപ്പിച്ചു. റേഡിയോ, ടെലിവിഷൻ പരിപാടികൾ, വാർത്താ റിപ്പോർട്ടുകൾ, വാർത്താക്കുറിപ്പുകൾ, സമൂഹ മാധ്യമങ്ങൾക്കായി രൂപകൽപ്പന ചെയ്‌ത വൈവിധ്യമാർന്ന ഡിജിറ്റൽ ഉള്ളടക്കം എന്നിവ ഇതിൽ ഉൾപ്പെടുന്നു. സലാല വിമാനത്താവളത്തിന്റെ സന്നദ്ധത, മുൻകരുതൽ സേവനങ്ങളും നടപടിക്രമങ്ങളും മെഡിക്കൽ, ആംബുലൻസ് സേവനങ്ങൾ, പൈതൃക, ടൂറിസം തയ്യാറെടുപ്പുകൾ, താമസ സൗകര്യങ്ങൾ, സീസണിൽ ആവശ്യമായ ടൂറിസ്റ്റ് സേവനങ്ങൾ എന്നിവയും ചർച്ചയിൽ ഉൾപ്പെടുത്തി.