സ്വദേശിവൽക്കരണം പാലിക്കാതിരിക്കൽ; സർക്കാർ കരാർ നൽകില്ല

മസ്‌കത്ത്‌: അംഗീകൃത സ്വദേശിവൽക്കരണ നിരക്കുകൾ പാലിക്കാത്ത സ്വകാര്യ മേഖല കമ്പനികൾക്ക്‌ സർക്കാർ കരാറുകൾക്ക് യോഗ്യതയില്ലെന്ന്‌ ഒമാൻ ടെൻഡർ ബോർഡ്. ദേശീയ തൊഴിൽ നയം നടപ്പാക്കുന്നത് കർശനമാക്കുന്നതിന്റെ ഭാഗമായി നടപടി നിർബന്ധമാക്കിയതായും അധികൃതർ അറിയിച്ചു. ടെൻഡർ നിയമത്തിന് കീഴിൽ പ്രവർത്തിക്കുന്ന എല്ലാ മന്ത്രാലയങ്ങളും സർക്കാർ സ്ഥാപനങ്ങളും നിശ്ചിത സ്വദേശിവൽക്കരണ നിലവാരം പാലിക്കുന്നതിൽ പരാജയപ്പെടുന്ന കമ്പനികൾക്ക് കരാർ നൽകുന്നത് ഒഴിവാക്കണമെന്നും നിർദേശമുണ്ട്‌. ടെൻഡർ ബോർഡ്‌ ജനറൽ സെക്രട്ടറിയറ്റ് പുറപ്പെടുവിച്ച സർക്കുലറിലാണ്‌ ഇക്കാര്യം വ്യക്തമാക്കുന്നത്‌.

ടെൻഡർ പ്രഖ്യാപിക്കുന്നതിനുമുമ്പ് എല്ലാ ടെൻഡർ രേഖകളിലും സ്വദേശിവൽക്കരണ നിരക്കുകൾ പാലിക്കുന്നതുമായി ബന്ധപ്പെട്ട വ്യവസ്ഥ ഉൾപ്പെടുത്താൻ സർക്കാർ സ്ഥാപനങ്ങൾക്ക് നിർദേശം നൽകുന്നു. നൽകിയിരിക്കുന്ന ഔദ്യോഗിക ഫോർമാറ്റിന് അനുസൃതമായി ഈ വ്യവസ്ഥ ചേർക്കേണ്ടതാണ്. കൂടാതെ, ദേശീയ തൊഴിൽ ശക്തി ലക്ഷ്യങ്ങൾ പാലിക്കാത്തത് ബിഡ്ഡിങ്‌ പ്രക്രിയയിൽനിന്ന് അയോഗ്യതയ്ക്ക് കാരണമാകുമെന്ന് വ്യക്തമാക്കുകയും വേണം.

അനുസരണം കാര്യക്ഷമമാക്കുകയും സുതാര്യത വർധിപ്പിക്കുകയും ചെയ്യുന്ന നീക്കത്തിൽ, എസ്‌നാഡ് ഇലക്‌ട്രോണിക് ടെൻഡറിങ്‌ സിസ്റ്റം വഴി കമ്പനിയുടെ സ്വദേശിവൽക്കരണ ലക്ഷ്യങ്ങൾ പാലിക്കുന്നുണ്ടോയെന്ന് സർക്കാർ സ്ഥാപനങ്ങൾ പരിശോധിക്കണമെന്നും സർക്കുലർ നിർദേശിക്കുന്നു. ഏതെങ്കിലും കരാർ നൽകുന്നതിനുമുമ്പ് ഈ പരിശോധന നടത്തണം. തൊഴിൽ മന്ത്രാലയത്തിൽനിന്ന് എസ്‌നാഡ് നേരിട്ട് തത്സമയ തൊഴിൽ ഡാറ്റ എടുക്കും. ഈ ഡിജിറ്റൽ സംവിധാനത്തിന്റെ പ്രവർത്തനം അനുസരിക്കാത്ത കമ്പനികളെ പ്രാരംഭ ഘട്ടത്തിൽതന്നെ പുറത്താക്കുന്നുവെന്ന് ഉറപ്പാക്കുന്നു. ഇത് ലംഘന സാധ്യത കുറയ്ക്കുന്നുവെന്നും സർക്കുലറിലുണ്ട്‌.

ഒമാനിൽ രജിസ്റ്റർ ചെയ്തിട്ടില്ലാത്തതും എന്നാൽ, വലിയ തോതിലുള്ളതോ തന്ത്രപരമോ ആയ സർക്കാർ പദ്ധതികൾക്കായുള്ള ടെൻഡറുകളിൽ പങ്കെടുക്കുന്ന അന്താരാഷ്ട്ര കമ്പനികൾക്കും സ്ഥാപനങ്ങൾക്കും പുതിയ നിയമങ്ങൾ ബാധകമാണ്. ഒരു പദ്ധതിയുടെ ജീവിതചക്രത്തിലുടനീളം ഈ കമ്പനികൾ ഒമാന്റെ തൊഴിൽ ശക്തി വികസനത്തിനും ദേശീയ സാമ്പത്തിക ലക്ഷ്യങ്ങൾക്കും എത്രത്തോളം ഫലപ്രദമായി സംഭാവന നൽകുന്നുവെന്ന് വിലയിരുത്തുന്നത് ഇതിൽ ഉൾപ്പെടുന്നു. ടെൻഡർ ബോർഡ് എല്ലാ മന്ത്രാലയങ്ങളോടും പൊതുമേഖല യൂണിറ്റുകളോടും സർക്കുലറിലെ വ്യവസ്ഥകൾ പൂർണമായും പാലിക്കാൻ ആഹ്വാനം ചെയ്തു. പൊതുമേഖല കരാറുകളിൽ ഒമാനി പൗരന്മാരുടെ തൊഴിൽ, നിർബന്ധമായ ആവശ്യകതയായി മാറുന്നുവെന്ന് ഉറപ്പാക്കാൻ ഇതുവഴി സാധിക്കുമെന്നും അറിയിച്ചു. ഒമാൻ വിഷൻ 2040ന്റെ ലക്ഷ്യങ്ങളുമായി ഈ നീക്കം പൊരുത്തപ്പെടുന്നുവെന്നും അധികൃതർ അറിയിച്ചു.