കാര്യമായ ചലനമില്ലാതെ സ്വർണവില; പവന് കുറഞ്ഞത് 40 രൂപ മാത്രം

വെബ് ഡെസ്ക്

Published on Jun 23, 2025, 11:21 AM | 2 min read

കൊച്ചി : സംസ്ഥാനത്ത് സ്വർണവിലയിൽ കാര്യമായ ചലനങ്ങളില്ല. പവന് ഇന്ന് 40 രൂപ മാത്രമാണ് കുറഞ്ഞത്. ഇന്ന് 73,840 ആണ് പവൻ വില. ഇന്നലെ 73,880 രൂപയായിരുന്നു സ്വർണത്തിന്റെ വില. ഗ്രാമിന് 5 രൂപ കുറഞ്ഞ് വില 9,230 ആയി. പെരുന്നാൾ ദിനത്തിൽ കുത്തനെ ഇടിഞ്ഞ സ്വർണവില പിന്നീട് തുടർച്ചയായി വർധിക്കുകയായിരുന്നു. 71,000ത്തിലേക്ക് താഴ്ന്ന വില പിന്നീട് 74,000 കടന്നു. മുമ്പ് ഏപ്രിൽ 22നും പവൻ വില 74,000 കടന്നിരുന്നു.

അഞ്ച് ശതമാനം പണിക്കൂലിയും നികുതിയും ഉൾപ്പെടെ ഒരുപവന് 78,000ത്തോളം രൂപ നൽകേണ്ടി വരും. 24 കാരറ്റിന് പവന് 80,552 രൂപയും ഗ്രാമിന് 10,069 രൂപയുമാണ് വില. 18 കാരറ്റിന് പവന് 60,416 രൂപയും ഗ്രാമിന് 7,552 രൂപയുമാണ് വില. ജനുവരി 22നാണ് സ്വർണവില ആദ്യമായി 60,000 കടന്നത്. തുടർന്ന് ഫെബ്രുവരി 11ന് പവൻ വില 64,000 കടന്നിരുന്നു. മാർച്ച് 14ന് 65,000 കടന്ന വില ഏപ്രിൽ 12നാണ് ആദ്യമായി 70,000 കടന്നത്. തുടർന്ന് ഏപ്രിൽ 17ന് പവൻ വില 71,000ഉം ഏപ്രിൽ 22ന് വില 74,000ഉം കടന്നു.

രാജ്യാന്തര വിപണിയിലെ ചലനങ്ങൾക്ക് അനുസരിച്ചാണ് രാജ്യത്ത് സ്വർണവില നിശ്ചയിക്കുന്നത്. അന്താരാഷ്ട്ര വിപണിയിലെ മാറ്റങ്ങളും ട്രംപിന്റെ വ്യാപാരയുദ്ധവും താരിഫുമെല്ലാം രാജ്യത്തെ സ്വർണവിലയിൽ പ്രതിഫലിക്കുന്നുണ്ട്. പശ്ചിമേഷ്യയിൽ സംഘർഷ സാഹചര്യം ഉടലെടുത്തത് സ്വർണവിലയെ കാര്യമായി ബാധിക്കുമെന്നാണ് കണക്കുകൾ സൂചിപ്പിക്കുന്നത്. സ്വർണത്തിന്റെ രാജ്യാന്തര വില, ഡോളർ – രൂപ വിനിമയ നിരക്ക്, ഇറക്കുമതി തീരുവ എന്നിവ അടിസ്ഥാനമാക്കിയാണ് സംസ്ഥാനത്ത് സ്വർണ വില നിർണയിക്കുന്നത്. വെള്ളിയ്ക്ക് ഗ്രാമിന് 120 രൂപയും കിലോഗ്രാമിന് 1,20,000 രൂപയുമാണ് വില.