പാഴ്​വസ്തുക്കളിൽ വിരിയുന്നു 
കമനീയ രൂപങ്ങൾ

മട്ടന്നൂർ

മട്ടന്നൂർ– തലശേരി റോഡിലെ സിന്ധു രാജീവൻ വീട്ടിൽ ഒരുദിവസം ഭക്ഷണം പാകം ചെയ്യുന്നതിനിടെ സ്റ്റീൽപാത്രം കരിഞ്ഞു പോയി. കളയാനോ ആക്രിക്കാർക്ക്​ തൂക്കി വിൽക്കാനോ തോന്നിയില്ല. തന്റെ ഭാവനക്കനുസരിച്ച്‌ ചിത്രപ്പണികൾ ചെയ്തതോടെ അത്​ മനോഹര വസ്തുവായി. പുതിയ വീട്​ നിർമിച്ചപ്പോൾ കൊണ്ടുവന്ന പെയിന്റിന്റെ ബക്കറ്റുകൾക്കും ഇ‍ൗ വീട്ടമ്മയുടെ കരവിരുതിൽ വൈവിധ്യമായ രൂപം കൈവന്നു. കീഴല്ലൂർ വില്ലേജ്​ ഓഫീസ്​ ജീവനക്കാരനായ രാജീവനെ തേടി വീട്ടിലെത്തിയ നഗരസഭാ ചെയർമാൻ എൻ ഷാജിത്താണ്​ പ്രദർശനം ഒരുക്കാൻ പ്രേരണയായത്​. ചെറുപ്പം മുതൽതന്നെ സിന്ധു രാജീവൻ പാഴ്വസ്തുക്കളൊന്നും കളയാറുണ്ടായിരുന്നില്ല. സമയം കിട്ടുമ്പോഴൊക്കെ അവയിൽ ചിത്രപ്പണികളൊരുക്കി സൂക്ഷിച്ചുവയ്‌ക്കും. അങ്ങനെ ​ നിർമിച്ച വിവിധ തരത്തിലുള്ള കമനീയ രൂപങ്ങളാണ്​ വീട്ടിലുള്ളത്​. ഇവരുടെ കഴിവ്​ തിരിച്ചറിഞ്ഞ എൻ ഷാജിത്താണ്​ വികസന സദസിന്റെ ഭാഗമായി പ്രദർശനം ഒരുക്കാൻ നിർദേശിച്ചത്​. മട്ടന്നൂർ നഗരസഭയുടെ വികസന സദസ്സിന്റെ ഭാഗമായി ഒരുക്കിയ പാഴ്വസ്തുക്കൾ കൊണ്ട്​ നിർമിച്ച വൈവിധ്യമാർന്ന രൂപങ്ങളുടെയും പെയിന്റിങ്ങുകളുടെയും പ്രദർശനം ശ്രദ്ധേയമായി. പാത്രങ്ങളിലും സാരികളിലും തുണികളിലും വരച്ചതും തുന്നിയതുമായ ചിത്രങ്ങളും മധുര കോട്​സിന്റെ പ്രത്യേക നൂൽ വരുത്തി തയ്യാറാക്കിയ ചിത്രങ്ങളും പ്രദർശനത്തിൽ ഒരുക്കിയിരുന്നു. അരവണ പായസത്തിന്റെ ബോട്ടിലുകൾ, മുള കഷണങ്ങൾ, പിവിസി പൈപ്പ്​ എന്നിവയെല്ലാം മനോഹരക്കാഴ്ചകളായി.