ആർഎസ്​എസ്​ കൊലയാളി സംഘങ്ങൾ ലഹരിക്കടത്തിലും സജീവം

തലശേരി

നാടിന്റെ സമാധാനാന്തരീക്ഷം തകർക്കുന്ന ആർഎസ്​എസ്​ കൊലയാളി സംഘങ്ങൾ ക്വട്ടേഷൻ, ലഹരിക്കടത്ത്​, പിടിച്ചുപറി തുടങ്ങിയ മേഖലകളിലും സജീവം. ലഹരിക്കടത്ത്​ കേസിൽ പാനൂർ കുറ്റേരി കെ സി മുക്കിലെ അരുൺ ഭാസ്​കറിനെ ബംഗളൂരുവിൽനിന്ന്​​ ഇടുക്കി കട്ടപ്പന പൊലീസ്​ കഴിഞ്ഞ ദിവസം അറസ്​റ്റു​ചെയ്​തതോടെ രാസലഹരി വിൽപ്പനയിലും സ്വയംസേവക സാന്നിധ്യം തെളിഞ്ഞു. എംഡിഎംഎ വിൽപന നടത്തുന്ന സംഘത്തിലെ കണ്ണിയാണ്​ അരുൺ ഭാസ്​കറെന്ന്​ ഇതോടെ തെളിയുകയാണ്​. സിപിഐ എം മാഹി പള്ളൂർ ലോക്കൽ കമ്മിറ്റി അംഗവും നഗരസഭ ക‍ൗൺസിലറുമായിരുന്ന കണ്ണിപ്പൊയിൽ ബാബു വധക്കേസ്​ പ്രതിയാണ്​ അരുൺ ഭാസ്​കർ. പാനൂർ പാലക്കൂൽ, എലാങ്കോട്​ എന്നിവിടങ്ങളിൽനിന്ന്​ 8.35 ലക്ഷം രൂപ 2019 സെപ്​തംബറിൽ കവർച്ചചെയ്​ത കേസിലും ഇയാൾ പ്രതിയായിരുന്നു. മോഷണത്തിൽമാത്രമല്ല, ക്വട്ടേഷനിലും സ്വയം സേവകർ കഴിവ്​ തെളിയിച്ചു. പള്ളൂരിലെ മൂന്നംഗ സംഘമാണ്​ എൻആർ കോൺഗ്രസ്​ നേതാവ്​ വളവിൽ സുധാകരനെ ആക്രമിക്കാനുള്ള ക്വട്ടേഷൻ ഏറ്റെടുത്തത്​. രണ്ടു കാലും അടിച്ചൊടിക്കാനായിരുന്നു ക്വട്ടേഷൻ. പള്ളൂർ ഗ്രാമത്തിലെ പൂശാരിക്കോവിലിനടുത്ത നിജേഷ്​ പിടിയിലായി. ആർഎസ്​എസ്​ ശാഖ മുഖ്യശിക്ഷക്​​ കരീക്കുന്നുമ്മൽ സുനി, ഒ പി രജീഷ്​ എന്നിവർ ഒളിവിലാണ്​. ഇവരും കണ്ണിപ്പൊയിൽ ബാബു വധക്കേസ്​ പ്രതികളാണ്​. ​ കൊലയാളികൾക്ക്​ 
നേതൃപദവി ​കൊലപാതകക്കേസിലും ക്വട്ടേഷൻ ഇടപാടിലും ഉൾപ്പെട്ടവർക്ക്​ നേതൃപദവിയിലേക്കും ബിജെപിയിൽ സംവരണമുണ്ട്​. കോടിയേരി നങ്ങാറത്ത്​പീടികയിലെ കെ പി ജിജേഷ്​ വധക്കേസ്​ പ്രതിയാണ്​ ബിജെപി മാഹി മണ്ഡലം പ്രസിഡന്റ്​ പ്രഭീഷ്​കുമാർ. മത്സ്യത്തൊഴിലാളി കോടിയേരി പുന്നോൽ താഴെവയലിലെ കെ ഹരിദാസൻ വധക്കേസിൽ മുഖ്യ പ്രതിയാണ്​ ബിജെപി തലശേരി മണ്ഡലം പ്രസിഡന്റ്​ കെ ലിജേഷ്. നേതൃനിരയിലേക്ക്​ ആർഎസ്​ എസ്–ബിജെപി നേതൃത്വം​ പരിഗണിക്കാത്തവരാണ്​ ക്വട്ടേഷനിലൂടെയും എംഡിഎംഎയടക്കമുള്ള രാസലഹരി വിറ്റും പണം തട്ടിപ്പറിച്ചും ജീവിക്കുന്നത്​.