തുമ്പിക്കൈയില്ലാത്ത ആനക്കുട്ടി വീണ്ടും അതിരപ്പിള്ളിയിൽ

ചാലക്കുടി

തുമ്പിക്കൈയ്യില്ലാത്ത ആനക്കുട്ടി വീണ്ടും അതിരപ്പിള്ളി വനമേഖലയിലെത്തി. പറയന്‍പാറ തോടിന് സമീപം പ്ലാന്റേഷന്‍ എണ്ണപ്പന തോട്ടത്തിലാണ് കഴിഞ്ഞ ദിവസം വൈകിട്ട് അഞ്ചോടെ ആനക്കുട്ടിയെ കണ്ടത്. ആനക്കൂട്ടത്തോടൊപ്പമാണ് ആനക്കുട്ടിയെത്തിയത്. വനംവകുപ്പിന്റെ നേതൃത്വത്തില്‍ ആനക്കുട്ടിയെ നിരീക്ഷിച്ചു. നിലവില്‍ ആരോഗ്യപ്രശ്‌നങ്ങളൊന്നുമില്ലെന്നാണ് വിലയിരുത്തല്‍. ആനക്കൂട്ടത്തോടൊപ്പമാണെങ്കിലും സ്വന്തമായിത്തന്നെയാണ് വെള്ളം കുടിക്കുന്നതും തീറ്റയെടുക്കുന്നതും. 2023 ജനുവരി 10നാണ് പ്ലാന്റേഷന്‍ ഭാഗത്ത് തുമ്പിക്കൈയില്ലാത്ത ആനക്കുട്ടിയെ ആദ്യമായി കാണുന്നത്. വൈല്‍ഡ് ലൈഫ്‌ ഫോട്ടോഗ്രാഫര്‍മാരായ ജിലേഷ് ചന്ദ്രന്‍, സജിന്‍ ഷാജു, വിജീഷ് മുന്നോര്‍പ്പിള്ളി എന്നിവരാണ് അംഗവൈകല്യമുള്ള ആനക്കുട്ടിയുടെ ചിത്രം പുറത്തുകൊണ്ടുവന്നത്. തുടര്‍ന്ന് വനംവകുപ്പ് നിരീക്ഷണം നടത്തുകയും ആനക്കുട്ടിയുടെ ആരോഗ്യനില വിലയിരുത്തുകയും ചെയ്തിരുന്നു. പിന്നീട് പലതവണ ഈ മേഖലയില്‍ ആനക്കുട്ടിയെ കണ്ടെങ്കിലും കുറച്ചുനാളുകളായി ഒരുവിവരവും ഇല്ലായിരുന്നു. ഇതിനിടെയാണ് കഴിഞ്ഞ ദിവസം വീണ്ടുമെത്തിയത്. ജന്മനാല്‍ തുമ്പിക്കൈ ഇല്ലാത്തതാണോ അതോ മറ്റ് മൃഗങ്ങളുടെ ആക്രമണത്തില്‍ നഷ്ടമായതാണോ എന്ന കാര്യത്തിലും വ്യക്തതയില്ല.