കെടുതികളിൽ കരുതലകാൻ കരുത്തോടെ ‘സന്നദ്ധം’

തൃശൂർ

ദുരന്തനിവാരണ പ്രവർത്തനങ്ങളിൽ ഇറങ്ങുന്ന സാമൂഹിക സന്നദ്ധസേനയ്​ക്ക് ഇനി കൂടുതൽ കരുത്ത്​. സാമൂഹിക സന്നദ്ധ സേന ഡയറക്ടറേറ്റിന്റെ നേതൃത്വത്തിൽ സംസ്ഥാനത്തെ തെരഞ്ഞെടുത്ത സന്നദ്ധ പ്രവർത്തകർക്ക്​ ഫയർ അക്കാദമിയിൽ ‘സന്നദ്ധം’ ദുരന്തനിവാരണ പരിശീലനം നൽകി. ഇൻസ്​റ്റിറ്റ്യൂട്ട്​ ഓഫ്​ ലാൻഡ്​​ ഡിസാസ്​റ്റർ മാനേജ്​മെന്റിൽ നൽകിയ പരിശീലനത്തിന്​ പുറമെയാണ്​ ഫയർ അക്കാദമിയിൽ പ്രായോഗിക വിദഗ്​ധ പരിശീലനം നൽകിയത്​. സാമൂഹ്യ പ്രതിസന്ധികളിൽ ഓടിയെത്താൻ സന്നദ്ധപ്രവർത്തകരെ പ്രാപ്തരാക്കുകയെന്ന ലക്ഷ്യത്തോടെ​ മുഖ്യമന്ത്രി പിണറായി വിജയന്റെ നേരിട്ടുള്ള ഇടപെടലിൽ ​ സംസ്ഥാന പൊതുഭരണ വകുപ്പിന്റെ കീഴിൽ ​ സാമൂഹിക സന്നദ്ധസേനയ്​ക്ക്​ രൂപം നൽകിയിരുന്നു. സന്നദ്ധസേന ഡയറക്ടറേറ്റ് www.sannadhasena.kerala.gov.in വെബ്സൈറ്റ് രൂപീകരിച്ച്​ രജിസ്​ട്രേഷനും നടത്തി. സംസ്ഥാനത്ത്​ മൂന്നര ലക്ഷം പേർ രജിസ്​റ്റർ ചെയ്​തു. ഇവർക്ക്​ ഓൺലൈനായും നേരിട്ടും നിശ്ചിത വിഷയങ്ങളിൽ പരിശീലനം നൽകി. രണ്ടാംഘട്ടത്തിലാണ്​ തെരഞ്ഞെടുത്തവർക്ക്​ ‘സന്നദ്ധം’ വിദഗ്​ധ പരിശീലനം ആരംഭിച്ചത്​. ദുരന്തനിവാരണ പരിശീലനത്തിൽ 14 ജില്ലകളിൽ നിന്നായി ​ 12 പെൺകുട്ടികളും 23 ആൺകുട്ടികളും പങ്കെടുത്തു. സിവിൽ ഡിഫെൻസ്​ അക്കാദമി സ്​റ്റേഷൻ ഓ-ഫീസർ പി കെ പ്രമോദിന്റെ നേതൃത്വത്തിലുള്ള സംഘമാണ്​ പരിശീലനം നൽകിയത്​. തുടർന്ന്​ എല്ലാ ജില്ലകളിലും പരിശീലനം സിദ്ധിച്ച ടീമിനെ സജ്ജമാക്കലാണ്​ ലക്ഷ്യമെന്ന്​ സാമൂഹിക സന്നദ്ധസേന പ്രോജക്ട്​ ഡയറക്ടർ ആര്യ അനിൽ പറഞ്ഞു. പഞ്ചായത്ത്​, വാർഡ്​ തലങ്ങളിൽ സേനയ്​ക്ക്​ രൂപം നൽകും. 10 വീടുകൾക്ക്​ ഒരു കമ്യൂണിറ്റി വളണ്ടിയർ എന്നതാണ്​ ലക്ഷ്യം. 18നും 40നും ഇടയിൽ പ്രായമുള്ളവരാണ്​ സേനയിലുള്ളത്​. ഇവരെ സാമൂഹ്യ പ്രവർത്തനങ്ങളിലും പങ്കാളികളാക്കും. പാലിയേറ്റീവ്​ കെയർ പ്രവർത്തനം‍, വാതിൽപ്പടി സേവനം, ലഹരി വിരുദ്ധ പ്രചാരണം എന്നിവയിൽ പങ്കാളികളാണെന്നും അവർ പറഞ്ഞു.