ഹൈക്കോടതി വിധി ലംഘിച്ച്​

തൃശൂർ

കോൺഗ്രസ്​ ഭരിക്കുന്ന തൃശൂർ അർബൻ സഹകരണ ബാങ്കിൽ പുതുതായി നടത്തിയ നിയമനം ഹൈക്കോടതി വിധിക്ക്​ എതിര്​. നിയമനം സംബന്ധിച്ച്​ പരാതി ലഭിച്ചിരുന്നതായി സഹകരണ വകപ്പ്​ ജോയിന്റ്​ രജിസ്​ട്രാർ ഓഫീസിൽ നിന്ന്​ വിവരാവകാശ നിയമപ്രകാരം ലഭിച്ച മറുപടിയിൽ പറയുന്നു. ഹൈക്കോടതിയുടെ ഡബ്ല്യൂപിസി 15779–25, ഡബ്ല്യൂപിസി 17969– 25 വിധി പ്രകാരമുള്ള നിർദേശങ്ങൾക്ക്​ വിധേയമായി മാത്രമേ നിയമനം നടത്താനാകൂ. ഇതിന്​ ​ വിരുദ്ധമായ നിയമന നടപടികൾ സ്വീകരിച്ചിട്ടുണ്ടെങ്കിൽ നിർത്തിവയ്ക്കാ​ൻ കർശന നിർദേശം നൽകി. പുതിയ നിയമനം ശ്രദ്ധയിൽപ്പെട്ടില്ലെന്നും മറുപടിയിൽ പറയുന്നു. സഹകാരി നടത്തറ സ്വദേശി എം കെ മാത്യുവാണ്​ വിവരാവകാശപ്രകാരം സഹകരണവകുപ്പിനെ സമീപിച്ചത്​. സഹകരണ സംഘം രജിസ്​ട്രാറുടെ 2013 ആഗസ്​റ്റ്​ 30ൽ 53– 13 നമ്പർ സർക്കുലറിലെ മാനദണ്ഡങ്ങൾ പ്രകാരം തൃശൂർ അർബൻ ബാങ്കിന്റെ ക്ലാസിഫിക്കേഷൻ പുനർ നിർണയിച്ച ശേഷം മാത്രമേ നിയമനം നടത്താനാകൂവെന്ന്​ ജോയിന്റ്​ രജിസ്​ട്രാർ നേരത്തെ ഉത്തരവിട്ടിരുന്നു. പുതുക്കിയ ക്ലാസിഫിക്കേഷൻ പ്രകാരം സ്​റ്റാഫ്​ പാറ്റേൺ നിജപ്പെടുത്തി ഒഴിവുകൾ തിട്ടപ്പെടുത്തണം. അതിനുശേഷമേ നിയമനം നടത്താനാകൂ. ഇതു ലംഘിച്ചാണ്​ പുതിയ നിയമനമെന്ന്​ ആരോപിച്ച്​ സഹകാരികൾ ഹൈക്കോടതിയെ സമീപിച്ചിരുന്നു. 12 ന് ഹൈക്കോടതിയിൽ കേസ് വീണ്ടും പരിഗണിക്കും​. കഴിഞ്ഞ രണ്ടു വർഷം ബാങ്ക്​ നഷ്ടത്തിലാണ്​. അതിനാൽ റിസർവ്​ ബാങ്കിന്റെ പിസിഎ ലിസ്​റ്റിൽ ഉൾപ്പെടുത്തി നിയന്ത്രണങ്ങളും ഏർപ്പെടുത്തിയിട്ടുണ്ട്​. സ്വർണ പണ്ടലേലത്തിലെ ക്രമക്കേടിൽ ബാങ്ക്​ ചെയർമാൻ പോൾസൺ ആലപ്പാട്ടിനെതിരായ വിജിലൻസ്​ നടപടി ആരംഭിക്കാനിരിക്കുകയാണ്​. 27 ന് ചേരുന്ന ബാങ്ക്​ വാർഷിക പൊതുയോഗത്തിൽ ഇത്തരം വിഷയം സഹകാരികൾ ചർച്ചയാക്കും.