പുലിഭീതിയൊഴിയാതെ മലക്കപ്പാറയിലെ വീരാന്‍കുടി ഉന്നതി

ചാലക്കുടി

പുലിഭീതിയൊഴിയാതെ മലക്കപ്പാറയിലെ വീരാന്‍കുടി ഉന്നതിയിലെ കുടുംബങ്ങള്‍. നാലു വയസ്സുകാരനെ പുലിയാക്രമിച്ച സംഭവിത്തിന് പിന്നാലെ വീണ്ടും ഉന്നതിയില്‍ പുലിയെത്തി. വെള്ളിയാഴ്ച വൈകിട്ട് നാല് തവണയാണ് പുലി ഉന്നതിയിലെത്തിയത്. ഷീറ്റിട്ട് മറച്ച ഷെഡുകളില്‍ താമസിക്കുന്ന ഇവിടത്തുകാര്‍ കുട്ടികളെ നെഞ്ചോട് ചേര്‍ത്ത് പിടിച്ചാണ് നേരം വെളുപ്പിച്ചത്. പുലിയുടെ സാന്നിധ്യമുള്ള സാഹചര്യത്തില്‍ ശനിയാഴ്ച കുടുംബങ്ങളെ മാറ്റി പാര്‍പ്പിക്കാനായി തഹസില്‍ദാരുടെ നേതൃത്വത്തിലുള്ള സംഘമെത്തി. ഏഴ് വീട്ടുകാരാണ് ഈ ഉന്നതിയിലുള്ളത്. രണ്ട് കുടുംബങ്ങളെ കടമറ്റം ലയങ്ങളിലേക്ക് മാറ്റി. ബാക്കി അഞ്ച് കുടുംബങ്ങളെ മലക്കപ്പാറ കമ്യുണിറ്റി ഹാളിലേക്ക് താൽക്കാലികമായി മാറ്റാനുള്ള ശ്രമത്തിനിടെ വീണ്ടും പുലി ഉന്നതിയിലെത്തി. രാത്രി ഏഴോടെയാണ്​ പുലിയെത്തിയത്. പുലിയെ ഓടിച്ചുവിട്ടെങ്കിലും പുലി വീണ്ടും വരുമെന്ന ഭീതിയിലാണ് ഇവിടത്തുകാര്‍. മലക്കപ്പാറ വീരാന്‍കുടി ഉന്നതിയിലെ ബേബി -രാധിക ദമ്പതികളുടെ മകന്‍ രാഹുലിനെയാണ് കഴിഞ്ഞ ദിവസം പുലി ആക്രമിച്ചത്. വെള്ളി പുലര്‍ച്ചെ 2.45 ഓടെയായിരുന്നു സംഭവം. പരിക്കേറ്റ കുട്ടി തൃശൂര്‍ മെഡിക്കല്‍ കോളജ് ആശുപത്രിയിൽ ചികിത്സയിലാണ്.