തദ്ദേശ തെരഞ്ഞെടുപ്പിന്​ 
ഒരുക്കം തുടങ്ങി

തൃശൂർ

ജില്ലയിൽ തദ്ദേശ തെരഞ്ഞെടുപ്പിനുള്ള മുന്നൊരുക്കം ആരംഭിച്ചു. തെരഞ്ഞെടുപ്പിനുള്ള ഇലക്​ട്രോണിക്​ വോട്ടിങ്​ യന്ത്രങ്ങളുടെ ആദ്യഘട്ട പരിശോധന ആരംഭിച്ചു. തൃശൂർ താലൂക്ക്​ ഓഫീസ്​ അങ്കണത്തിലാണ്​ പരിശോധന​. ഒരുമാസം നീണ്ടുനിൽക്കും. പരിശോധനയുടെ ഭാഗമായി 13,240 ബാലറ്റ് യൂണിറ്റും 4, 880 കൺട്രോൾ യൂണിറ്റും പരിശോധിക്കും. ഒരുദിവസം 15 ടേബിളുകളിലായി 12 റൗണ്ട് പരിശോധന നടത്തും. റവന്യൂ വകുപ്പിൽനിന്നും തദ്ദേശസ്വയംഭരണ വകുപ്പിൽനിന്നുമായി 66 ഉദ്യോഗസ്ഥരാണ്​ പരിശോധനയിലുള്ളത്​. ത്രിതല പഞ്ചായത്തുകളിലേക്കുള്ള വോട്ടിങ്​ യന്ത്രങ്ങളുടെ പ്രാഥമിക പരിശോധനയാണ്​ വെള്ളിയാഴ്​ച ആരംഭിച്ചത്​. നഗരസഭകളിലേക്കുള്ള വോട്ടിങ്​ യന്ത്രങ്ങളുടെ പരിശോധന പിന്നീട്​ നടക്കും. മൂന്ന്​ ബാലറ്റ്​ മെഷീനുകളും ഒരു കൺട്രോൾ യൂണിറ്റുമാണ്​ ഓരോ ബൂത്തിലുമുണ്ടാവുക. തദ്ദേശ തെരഞ്ഞെടുപ്പിൽ വി വി പാറ്റ്​ ഉപയോഗിക്കില്ല. ഹൈദരാബാദിലെ ഇലക്​ട്രോണിക്​ കോർപറേഷൻ ഓഫ്​ ഇന്ത്യയിലെ എൻജിനിയർമാരാണ്​ പരിശോധനയ്​ക്ക്​ സാങ്കേതിക സഹായം നൽകുന്നത്​. ഉദ്യോഗസ്ഥർക്കുള്ള പരിശീലനം ബുധനാഴ്ച കലക്ടറേറ്റിൽ നടത്തി. ഇലക്ഷൻ ഡെപ്യൂട്ടി കലക്ടർ കെ കൃഷ്ണകുമാർ, ചാർജ്​ ഓഫീസർ കെ ജി പ്രാൺസിങ്​, ഡെപ്യൂട്ടി തഹസിൽദാർ എം എസ് മുരളി, ഭരത് ദർശൻ, കെ കെ സനിൽകുമാർ എന്നിവർ സംസാരിച്ചു.