മോഹൻ രാഘവൻ ചലച്ചിത്ര പുരസ്‌കാരം ശിവരഞ്ജിനിക്ക്

തൃശൂർ

ചലച്ചിത്രസംവിധായകനും നാടക പ്രവർത്തകനുമായിരുന്ന മോഹൻ രാഘവന്റെ സ്മരണാർഥം ഓഫ് സ്റ്റേജ് അന്നമനട നൽകുന്ന മികച്ച നവാഗത ചലച്ചിത്ര സംവിധായകർക്കുള്ള പുരസ്‌കാരം വിക്ടോറിയ സിനിമയുടെ സംവിധായിക ജെ ശിവരഞ്ജിനിക്ക്. സംവിധായകൻ ടി വി ചന്ദ്രൻ, ഛായാഗ്രാഹകൻ കെ ജി ജയൻ, ചലച്ചിത്ര നിരൂപകൻ ഡോ. സി എസ് വെങ്കിടേശ്വരൻ എന്നിവർ അംഗങ്ങളായ സമിതിയാണ് പുരസ്‌കാര നിർണയം നടത്തിയതെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. 25000 രൂപയും മുഹമ്മദ് അലി ആദം രൂപകല്പന ചെയ്ത ശിൽപ്പവും അടങ്ങുന്നതാണ് പുരസ്‌കാരം. ആശയം, പ്രമേയം, കഥ, അഭിനയം എന്നീ മേഖലകളിലെല്ലാം മികവും വ്യക്തിത്വവും പുലർത്തുന്നതാണ് ശിവരഞ്ജിനിയുടെ ആദ്യചിത്രമായ വിക്ടോറിയയെന്നാണ് ജൂറി വിലയിരുത്തൽ. ഡിസംബറിൽ മോഹൻ രാഘവന്റെ ജന്മനാടായ അന്നമനടയിൽ അന്നമനട, കാടുകുറ്റി പഞ്ചായത്തുകളുടെ സഹകരണത്തോടെ നടക്കുന്ന മോഹൻ രാഘവൻ അനുസ്മരണച്ചടങ്ങിൽ പുരസ്‌കാരം സമർപ്പിക്കും. സാഹിത്യകാരൻ പി കെ ശിവദാസ്, ചിത്രകാരൻ അലി ആദം അനുസ്മരണങ്ങളും ഇതോടൊപ്പം നടക്കുമെന്നും സംഘാടകർ അറിയിച്ചു. വാർത്താസമ്മേളനത്തിൽ ജൂറി അംഗം ഡോ. സി എസ് വെങ്കിടേശ്വരൻ, ഗ്രാമിക പ്രസിഡന്റ് പി കെ കിട്ടൻ, വി വി വിഷ്ണുദാസ്, കെ വി ശ്യാം എന്നിവർ പങ്കെടുത്തു.