അന്തിക്കാട് പൊലീസ് ക്യാമ്പ് 
പൂട്ടിച്ച വി എസ്

അന്തിക്കാട്

ചെത്തുതൊഴിലാളി വിരുദ്ധ നിലപാട് സ്വീകരിച്ച ആന്റണി സർക്കാരിനെതിരെ 2002ൽ സമരംചെയ്ത തൊഴിലാളികളെ ക്രൂരമർദനത്തിനിരയാക്കിയ പൊലീസ് വാഴ്ചയെ ചോദ്യംചെയ്​ത്​ അന്നത്തെ പ്രതിപക്ഷനേതാവായ വി എസ് അച്യുതാനന്ദൻ അന്തിക്കാട്ടെത്തിയത് ചോരതിളയ്​ക്കുന്ന ഓർമയായി ചെത്തുതൊഴിലാളികളും നാട്ടുകാരും മനസ്സിൽ സൂക്ഷിക്കുന്നു. 2002 ജൂൺ നാലിന്​ തൃശൂർ കലക്ടറേറ്റിലേക്ക് സിഐടിയു–എഐടിയുസി നേതൃത്വത്തിൽ ചെത്തുതൊഴിലാളികൾ നടത്തിയ ഐതിഹാസിക മാർച്ചിനെ പൊലീസ് നേരിട്ടത് കിരാത മർദനത്തിലൂടെയായിരുന്നു. 150 ഓളം തൊഴിലാളികൾക്കാണ് മർദനമേറ്റത്. സമരത്തെത്തുടർന്ന് അന്തിക്കാട്​ ആൽ സെന്ററിലെ കമ്യൂണിറ്റി ഹാളിൽ പൊലീസ് ക്യാമ്പ് ആരംഭിച്ചു. രാമവർമപുരം ക്യാമ്പിൽ നിന്ന് നൂറുകണക്കിന് പൊലീസുകാർ അന്തിക്കാടും പരിസരത്തും തമ്പടിച്ചു. സമരത്തിൽ പങ്കെടുത്ത തൊഴിലാളികളുടെ വീടുകളായിരുന്നു ലക്ഷ്യം. റിമാൻഡ്​ ചെയ്യാൻ കഴിയാത്ത തൊഴിലാളികളുടെ വീടുകളിൽ രാത്രിയിൽ ഗുണ്ടകളെപ്പോലെ പൊലീസ്​ കയറിച്ചെന്നു. 15 ദിവസത്തിനുശേഷം ജയിൽ മോചിതരായ തൊഴിലാളികൾക്ക് സിഐടിയു ഓഫീസിലും ചടയംമുറി സ്മാരകത്തിലുമായി ആയുർവേദ ചികിത്സാ ക്യാമ്പൊരുക്കിയിരുന്നു. ഈ വിവരമറിഞ്ഞാണ് വി എസ് അന്തിക്കാട്ടെത്തിയത്. ചികിത്സയിലുള്ള തൊഴിലാളികളെ സന്ദർശിച്ചശേഷം അദ്ദേഹം അന്തിക്കാട് പൊലീസ് സ്റ്റേഷൻ ലക്ഷ്യമാക്കി നടന്നു. രാഷ്ട്രീയത്തിനപ്പുറം വി എസിനു പിറകിൽ അന്തിക്കാട് ഗ്രാമം ജാഥയായി അണിനിരന്നു. എസ്​ഐയും മറ്റു പൊലീസുകാരും പ്രതിപക്ഷ നേതാവിനെ സല്യൂട്ട് നൽകി സ്വീകരിച്ചു. ഇരിക്കാൻ നൽകിയ കസേര തട്ടിമാറ്റി എസ്ഐയോട് അദ്ദേഹം ക്ഷുഭിതനായി. സൽക്കാരമൊന്നും വേണ്ടെന്ന് എസ്​ഐയുടെ മുഖത്തേക്ക് വിരൽചൂണ്ടി വി എസ് ഗർജിച്ചു. ‘എന്റെ തൊഴിലാളി സഖാക്കളെ ഇനി തൊട്ടാൽ വിവരമറിയും. തൊപ്പി വയ്ക്കാൻ തലയുണ്ടാകില്ല’. പൊലീസ് മാത്രമല്ല, കൂടെയുണ്ടായിരുന്നവർ ഒന്നടങ്കം ഞെട്ടി. വി എസിൽനിന്ന്​ ഇത്തരം ഒരു പ്രതിഷേധം ആരും പ്രതീക്ഷിച്ചിരുന്നില്ല. പൊലീസ് വിറച്ചു എന്നു മാത്രമല്ല, ആ ഒരൊറ്റ വാക്കുകൊണ്ട് കമ്യൂണിറ്റി ഹാളിലെ ക്യാമ്പ് അന്നുതന്നെ പിരിച്ചുവിടുകയും ചെയ്തു.