ദിവി ബിജേഷിന് അഭിമാന നേട്ടം

കഴക്കൂട്ടം ​

തായ്‌ലൻഡിൽ നടന്ന ഏഷ്യൻ യൂത്ത് റാപ്പിഡ് ചെസ് ചാമ്പ്യൻഷിപ്പിലും അഭിമാന നേട്ടം കൈവരിച്ച് ദിവി ബിജേഷ്. അണ്ടർ -10 ഗേൾസ് വിഭാഗത്തിൽ ഏഴുറൗണ്ടിലായി നടന്ന മത്സരത്തിൽ ആറ് പോയിന്റ് നേടി ദിവി വീണ്ടും ചാന്പ്യൻഷിപ് സ്വന്തമാക്കി. കഴക്കൂട്ടം സ്വദേശിയായ ദിവിയുടെ ഈ ആഴ്‌ചയിലെ രണ്ടാമത്തെ ചാന്പ്യൻഷിപ്പാണിത്. കഴിഞ്ഞ ആഴ്ച നടന്ന കോമൺവെൽത്ത് ചെസ് ചാമ്പ്യൻഷിപ്പിലും അണ്ടർ -12 പെൺകുട്ടികളുടെ വിഭാഗത്തിലും ദിവി ജേതാവായിരുന്നു. 2025-ൽ ദിവി വേൾഡ് കപ്പ് യു-10 ഗേൾസ് ചാമ്പ്യൻ, വേൾഡ് കഡറ്റ് റാപ്പിഡ് ചാമ്പ്യൻ, വേൾഡ് കഡറ്റ് ബ്ലിറ്റ്‌സ് വൈസ് ചാമ്പ്യൻ, വേൾഡ് സ്കൂൾസ് ചെസ് വൈസ് ചാമ്പ്യൻ എന്നീ നേട്ടങ്ങളും ദിവി സ്വന്തമാക്കിയിട്ടുണ്ട്. 75-ത്തിലധികം മെഡലുകൾ നേടിയ ദിവി കേരളത്തിന്റെ ഏറ്റവും പ്രായം കുറഞ്ഞ വിമൻ കാൻഡിഡേറ്റ് മാസ്റ്റർ (ഡബ്ലിയുസിഎം) കൂടിയാണ്. അലന്‍ ഫെല്‍ഡ്മാന്‍ പബ്ലിക് സ്‌കൂളിൽ അഞ്ചാം ക്ലാസ് വിദ്യാര്‍ഥിനിയാണ് ദിവി.