ചേർത്തലയിൽ വ്യാപക പ്രതിഷേധം 
സന്യസ്ഥരും തെരുവിലിറങ്ങി

ചേര്‍ത്തല

ഛത്തീസ്ഗഡില്‍ മലയാളി കന്യാസ്​ത്രീകളെ അന്യായമായി ജയിലിൽ അടച്ചതിനെതിരെ ചേർത്തലയിൽ വ്യാപക പ്രതിഷേധം. ജയിലിൽ കഴിയുന്ന കന്യാസ്​ത്രീകളുടെ സഭ അസീസി സിസ്​റ്റേഴ്‌സ് ഓഫ് മേരി ഇമാക്കുലേറ്റ് ആസ്ഥാനം കടുത്ത പ്രതിഷേധത്തിന്റെ പ്രഭവകേന്ദ്രമായി. ഭരണകൂട ഭീകരതയ്​ക്കും നീതിനിഷേധത്തിനും എതിരെ മുദ്രാവാക്യം ഉയർത്തി റാലി നടത്തി. സന്യാസിനികള്‍ക്ക്​ പുറമെ പുരോഹിതരും ജീവനക്കാരും അധ്യാപകരും രാഷ്​ട്രീയകക്ഷി പ്രതിനിധികളും അണിചേർന്നു. മന്ത്രി പി പ്രസാദ് റാലിയിലും പ്രതിഷേധയോഗത്തിലൂം ആദ്യാവസാനം പങ്കെടുത്തു. ഭരണകൂടവേട്ട പ്രതീകാത്മകമായി അവതരിപ്പിച്ച്​ രണ്ട്​ കന്യാസ്​ത്രീകളുടെ കൈകൾ പരസ്​പരം ചങ്ങലയിൽ ബന്ധിച്ച്​ പൊലീസ്​ നീങ്ങുന്നത്​ റാലിയുടെ മുന്നിൽ ആവിഷ്​കരിച്ചു. ദേശീയപാതയിലൂടെ നീങ്ങിയ റാലി എക്‌സ്​റേ കവലയില്‍ സമാപിച്ചു. കന്യാസ്​ത്രീകളുടെ മോചനത്തിന്​ സേക്രട്ട് ഹാര്‍ട്ട് ചാപ്പലില്‍ പ്രാര്‍ഥന നടത്തി. മതേതരത്വം സംരക്ഷിക്കുക, സത്യത്തെ തടവറയിലാക്കരുത് തുടങ്ങിയ മുദ്രാവാക്യങ്ങൾ റാലിയിലുയർന്നു. പ്രതിഷേധ റാലി മന്ത്രി പി പ്രസാദ്​ ഉദ്​ഘാടനംചെയ്​തു. സിപിഐ എം ജില്ലാ സെക്രട്ടറിയറ്റംഗം എ എം ആരിഫ്, മദര്‍ ജനറല്‍ സിസ്​റ്റര്‍ ഇസബെല്‍ ഫ്രാന്‍സിസ്​, അസി. മദര്‍ ജനറല്‍ സിസ്​റ്റര്‍ റജീസ്‌ മേരി, കെപിസിസി സെക്രട്ടറി എസ് ശരത്, ഫാ. പോള്‍ തുണ്ടുപറമ്പില്‍, സിസ്​റ്റര്‍ റോസ് ഫ്രാന്‍സിസ് എന്നിവര്‍ സംസാരിച്ചു. കന്യാസ്​ത്രീകളെ കള്ളക്കേസിൽ കുടുക്കി ജയിലിലടച്ച ഛത്തീസ്​ഗഡ്​ ബിജെപി സർക്കാരിന് എതിരെ ചേർത്തല നഗരത്തിൽ എൽഡിഎഫ്​ നേതൃത്വത്തിൽ ദേശീയപാതയോരത്ത്​ മതിലകം കോൺവെന്റിന്​ സമീപം പ്രതിഷേധസംഗമം ഒരുക്കി. മന്ത്രി പി പ്രസാദ്​, സിപിഐ എം ജില്ലാ സെക്രട്ടറിയറ്റംഗം എ എം ആരിഫ്​, ഏരിയ സെക്രട്ടറിമാരായ ബി വിനോദ്​, ബി സലിം, ജില്ലാ പഞ്ചായത്ത്​ വൈസ്​ പ്രസിഡന്റ്​ എൻ എസ്​ ശിവപ്രസാദ്​, സിപിഐ മണ്ഡലം സെക്രട്ടറിമാരായ എം സി സിദ്ധാർഥൻ, കെ ബി ബിമൽറോയ്​, അസി. മദര്‍ ജനറല്‍ സിസ്​റ്റര്‍ റജീസ്‌ മേരി എന്നിവർ സംസാരിച്ചു. സിപിഐ എം വടുതല ലോക്കൽ കമ്മിറ്റി പ്രതിഷേധ സംഗമം സംഘടിപ്പിച്ചു. മെഴുകുതിരി കത്തിച്ചായിരുന്നു പ്രതിഷേധം. സിപിഐ എം ഏരിയ കമ്മിറ്റിയംഗം കെ ഡി പ്രസന്നൻ ഉദ്​ഘാടനംചെയ്​തു. കെ വി വിശ്വസത്യൻ അധ്യക്ഷനായി. ലാൽജിമോൻ, ടി എസ്​ ഷിയാസ്​ എന്നിവർ സംസാരിച്ചു. സിപിഐ എം തൃച്ചാറ്റുകുളം ലോക്കൽ കമ്മിറ്റി നേതൃത്വത്തിൽ പ്രതിഷേധ പ്രകടനവും യോഗവും നടത്തി. വാഴത്തറവെളിയിൽ അസീസി കോൺവെന്റിന്​ സമീപം ചേർന്ന യോഗത്തിൽ സിപിഐ എം സംസ്ഥാന കമ്മിറ്റിയംഗം കെ പ്രസാദ്​, ജില്ലാ സെക്രട്ടറിയറ്റംഗം എ എം ആരിഫ്​, ഏരിയ സെക്രട്ടറി ബി വിനോദ്​, പി എം പ്രമോദ്​, മദർ സുപ്പീരിയർ സമീല എന്നിവർ സംസാരിച്ചു.