കുഷ്​ഠരോഗികളെ മോചിപ്പിച്ചവർ 
ഇന്ന്​ കാരാഗൃഹത്തിൽ

ചേർത്തല
സമൂഹം അകറ്റിയ കുഷ്​ഠരോഗികളെ സംരക്ഷിച്ച ചേർത്തലയിലെ പരിചരണകേന്ദ്രം മേരി ഇമ്മാക്കുലേറ്റ്​ സന്യാസിനിസഭ നേതൃത്വത്തിലാണ്​ പ്രവർത്തിച്ചത്​. സഭയുടെ കന്യാസ്​ത്രീകളായിരുന്നു രോഗികൾക്ക്​ താങ്ങും തണലുമായിനിന്നത്​. ഛത്തീസ്​ഗഡിൽ ബിജെപി സർക്കാർ മനുഷ്യക്കടത്ത്​ ആരോപിച്ച്​ ജലിലിലടച്ച സിസ്​റ്റർമാരായ പ്രീതി മേരിയും വന്ദന ഫ്രാൻസിസും കന്യാസ്​ത്രീകളും ഇവിടെ സേവനം അനുഷ്​​ഠിച്ചവരാണ്​. ഒരു കാലത്ത്​ കുഷ്​ഠരോഗികളെ തള്ളിയിരുന്ന ഇവിടെ ഇരുവരും കാരുണ്യവായ്​പോടെ പരിചരിച്ചു‍. സമർപ്പിതവും ത്യാഗപൂർണവുമായ സേവനങ്ങളുമായി അവർ രോഗികൾക്ക്​ ആശ്വാസമായി. രോഗികൾക്ക്​ ചികിത്സയും പരിചരണവും തൊഴിൽ സ‍ൗകര്യവും ഇവിടെയുണ്ടായിരുന്നു. രോഗനിർമാർജനം സാധ്യമായപ്പോൾ അന്തേവാസികൾ ഇല്ലാതായി.​ അതോടെയാണ്​ സ്ഥാപനത്തിന്റെ പ്രവർത്തനം അവസാനിപ്പിച്ചത്​. സഭാ നേതൃത്വത്തിലെ ഗ്രീൻ ഗാർഡൻസ് ​(മതിലകം) ആശുപത്രി അങ്കണത്തിലായിരുന്നു കുഷ്​ഠരോഗികളെ പാർപ്പിച്ച കേന്ദ്രം.