വഴികാട്ടാൻ പാരന്റിങ്​ ക്ലിനിക്കുകൾ

ആലപ്പുഴ

കുട്ടികളിലുണ്ടാകുന്ന സ്വഭാവ, -വൈകാരിക,- സാമൂഹിക,- മാനസിക- ആരോഗ്യ പ്രശ്നങ്ങളെ കൃത്യമായി പരിഹരിക്കാനും രക്ഷിതാക്കൾക്ക്​ വഴികാട്ടിയായി പാരന്റിങ്​ ക്ലിനിക്കുകൾ. വനിതാ ശിശുവികസന വകുപ്പിന്റെ ക്ലിനിക്കുകളിൽ ഇതുവരെ പരിഹാരം തേടിയെത്തിയത്​ 6763 പേർ. കുട്ടികൾക്ക്‌ പ്രിയപ്പെട്ടവരായി രക്ഷിതാക്കളെ വാർത്തെടുക്കുന്ന ക്ലിനിക്കുകളുടെ സേവനം 12 ബ്ലോക്കുകളിലുമുണ്ട്​. സർക്കാർ ഹൈസ്​കൂളുകളിലെ സൈക്കോ സോഷ്യൽ കൗൺസിലർമാരിൽ പ്രത്യേകപരിശീലനം ലഭിച്ചവരാണ്​ ക്ലിനിക്കിൽ. സൈക്കോളജിസ്​റ്റിന്റെയോ ക്ലിനിക്കൽ സൈക്കോളജിസ്​റ്റിന്റെയോ സേവനം ആവശ്യമായ കുട്ടികൾക്ക് ചേർത്തല മായിത്തറയിൽ പ്രവർത്തിക്കുന്ന ജില്ലാ റിസോഴ്സ് സെന്ററും വനിതാ ശിശുവികസന വകുപ്പ് ഒരുക്കിയിട്ടുണ്ട്. ജില്ലാ ശിശു സംരക്ഷണ ഓഫീസറാണ്​ മേൽനോട്ടം. ശനിയാഴ്​ചകളിൽ രാവിലെ 9.30 മുതൽ അഞ്ചുവരെയാണ്‌ സേവനം. രണ്ടാം ശനിക്കുപകരം വെള്ളിയാഴ്​ചയാണ്‌ ക്ലിനിക്‌. പഞ്ചായത്തുകളുടെ സഹകരണത്തോടെ ക്യാമ്പുകളും ഗൃഹസന്ദർശനവും നടത്തുന്നു. റഫറൽ സംവിധാനമായും പ്രവർത്തിക്കുന്നു.

കുട്ടികളെ സുരക്ഷിതരാക്കുക

​കുട്ടികളുടെ മാനസികാരോഗ്യത്തിന്‌ അടിത്തറയിടുന്നത്‌ രക്ഷിതാക്കളാണ്​. ചിരികളികളുമായി അവർക്കൊപ്പം കൂടുന്ന, നോവുകളറിഞ്ഞ്‌ ചേർത്തുപിടിക്കുന്ന, നല്ല വഴി കാണിക്കുന്ന മാതാപിതാക്കളാണ്‌ കുട്ടികളുടെ ശക്തി. തിരക്കുപിടിച്ച ജീവിതവും പഠനഭാരവും സാമൂഹികമാധ്യമങ്ങളുടെ അമിത ഉപയോഗവുമെല്ലാം ബന്ധങ്ങളെ സങ്കീർണമാക്കുന്നു​. അമിത ഫോൺ ഉപയോഗം, പഠനപ്രശ്‌നങ്ങൾ, പെരുമാറ്റ വൈകല്യങ്ങൾ, വൈകാരിക പ്രശ്‌നങ്ങൾ തുടങ്ങിയ പ്രശ്​നങ്ങൾ ചൂണ്ടിക്കാട്ടിയ കേസുകളുണ്ടെങ്കിലും അവയെക്കാൾ ഗുരുതരമായ വിഷയങ്ങളുമുണ്ടെന്ന് ചമ്പക്കുളം ബ്ലോക്ക്​ സൈക്കോ സോഷ്യൽ സ്​കൂൾ ക‍ൗൺസലർ എസ്​ ദേവീകൃഷ്​ണ പറഞ്ഞു. കുടുംബപ്രശ്‌നങ്ങൾ മുതൽ മാതാപിതാക്കളുടെ മദ്യപാനംവരെ എന്തുമാകാം. വീടുകളിൽ സുരക്ഷിതമായി താമസിക്കാൻ പറ്റാത്തവരും രക്ഷിതാക്കൾ ഉപേക്ഷിച്ചവരുമുണ്ട്​. ഇത്തരം കേസുകളിൽ സുരക്ഷയും നല്ല ജീവിതവും ഉണ്ടാക്കാൻ നടപടി സ്വീകരിക്കും. കുട്ടികളെ സുരക്ഷിത സാഹചര്യത്തിലെത്തിക്കുകയും നല്ല അന്തരീക്ഷമുണ്ടാക്കാൻ രക്ഷിതാക്കളെ പ്രാപ്​തരാക്കുകയുമാണ്​ ലക്ഷ്യമെന്നും ​ദേവീകൃഷ്​ണ പറഞ്ഞു.