ലിവിങ് വില്ലിന്​ ഡബിൾ ബെൽ

അമ്പലപ്പുഴ

ആലപ്പുഴ ഗവ. മെഡിക്കൽ കോളേജിൽ ലിവിങ് വിൽ ഇൻഫർമേഷൻ സെന്റർ പ്രവർത്തനമാരംഭിച്ചു. അനസ്​തേഷ്യ വിഭാഗത്തിന്റെ കീഴിലെ സമഗ്ര പാലിയേറ്റീവ് കെയർ ക്ലിനിക്കിലാണ് ലിവിങ് വിൽ ഇൻഫർമേഷൻ സെന്റർ. ജീവിതാന്ത്യഘട്ടത്തിലെ ചികിത്സാരീതികളെക്കുറിച്ച്​ വ്യക്തിയുടെ നിർദേശങ്ങളാണ് ലിവിങ് വില്ലിൽ രേഖപ്പെടുത്തുക. ചികിത്സാ തീരുമാനങ്ങൾ എടുക്കാനാകാത്ത അവസ്ഥയിൽ അവസംബന്ധിച്ച ആഗ്രഹങ്ങൾ മുൻകൂട്ടി രേഖപ്പെടുത്താം. വെന്റിലേഷൻ, ഡയാലിസിസ് പോലെ ജീവൻ നിലനിർത്തുന്ന ചികിത്സകൾ സ്വീകരിക്കണോ, വേണ്ടയോ, സംസ്​കാര ചടങ്ങുകൾ എന്നീ കാര്യങ്ങളും അറിയിക്കാം. അപേക്ഷപത്രവും നിർദേശങ്ങളും പാലിയേറ്റീവ് കെയർ യൂണിറ്റിൽ ലഭിക്കും. 18 വയസ്​ തികഞ്ഞവർക്ക്​ ലിവിങ് വിൽ ഒപ്പുവയ്​ക്കാം. ബന്ധുക്കളുമായി ആശയവിനിമയശേഷം ഒപ്പുവച്ച രേഖകൾ ഗസറ്റഡ് റാങ്കിലെ ഉദ്യോഗസ്ഥനും കൂടി ഒപ്പിട്ട്​ തദ്ദേശസ്ഥാപനത്തിന് കീഴിൽ സൂക്ഷിക്കും. സമഗ്ര പാലിയേറ്റീവ് കെയർ ക്ലിനിക്കിൽ രോഗികൾക്കായി ശനിയാഴ്​ചകളിൽ രാവിലെ 9.30 മുതൽ ഒപി സേവനവും ലഭ്യമാകും. 10 കിടക്ക ഉൾപ്പെടുത്തി സജ്ജീകരിച്ച വാർഡിൽ മറ്റ്​ വകുപ്പുകളിലെ ഡോക്​ടർമാരുടെ സേവനങ്ങളും ഉറപ്പാക്കും. തിങ്കൾമുതൽ വെള്ളിവരെയാണ് ഈ സേവനം. പ്രമുഖ സാന്ത്വനപരിചരണ വിദഗ്ധൻ ഡോ. എം ആർ രാജഗോപാൽ ഉദ്ഘാടനംചെയ്​തു. പ്രിൻസിപ്പൽ ഡോ. ബി പദ്മകുമാർ അധ്യക്ഷനായി.