ഡെന്റൽ കോളേജ്‌ പുതിയ കെട്ടിടത്തിൽ

ആലപ്പുഴ

സംസ്ഥാനത്ത്​ ആരോഗ്യ വിദ്യാഭ്യാസ രംഗത്ത് മാറ്റങ്ങളുടെ​ വൻ കുതിപ്പാണെന്ന്​ മന്ത്രി വീണാ ജോർജ്. ​ആലപ്പുഴ ഡെന്റൽ കോളേജിന്റെ പുതിയ കെട്ടിടം ഉദ്​ഘാടനംചെയ്യുകയായിരുന്നു മന്ത്രി. ആരോഗ്യവിദ്യാഭ്യാസം കുറഞ്ഞ ചെലവിൽ നൽകണമെന്നാണ്​ സർക്കാർ ഉദ്ദ്യേശിക്കുന്നത്‌. ഗവ. നഴ്​സിങ്​ സീറ്റുകളുടെ എണ്ണം 491ൽനിന്ന്​ 1250 ആയി വർധിപ്പിച്ചു. 15 സർക്കാർ, സർക്കാർ നിയന്ത്രണ ഗവ. നഴ്​സിങ് കോളേജുകളും പുതിയ ഡിപ്പാർട്ടുമെന്റുകളും തുടങ്ങി. കേരളത്തെ ദന്ത ചികിത്സയുടെ അന്താരാഷ്​ട്ര ഹബ്ബാക്കാനുള്ള പ്രവർത്തനമാണ്​ നടത്തുന്നത്​. ആലപ്പുഴ മെഡിക്കൽ കോളേജിലെ സൂപ്പർ സ്‌പെഷ്യാലിറ്റി വിഭാഗത്തിൽ സജ്ജമാക്കിയ ഡിജിറ്റൽ സബ്സ്ട്രാക്ഷൻ ആൻജിയോഗ്രാഫി ഉപകരണവും മന്ത്രി ഉദ്ഘാടനംചെയ്തു. എച്ച്​ സലാം എംഎൽഎ അധ്യക്ഷനായി. ജില്ലാ പഞ്ചായത്ത്​ പ്രസിഡന്റ്​ കെ ജി രാജേശ്വരി, മെഡിക്കൽ കോളേജ്​ പ്രിൻസിപ്പൽ ബി പത്മകുമാർ, ദന്തൽ കോളേജ്​ പ്രിൻസിപ്പൽ ഡോ. ടി വി അനുപം കുമാർ, സൂപ്രണ്ട്​ എ ഹരികുമാർ, ഡോ. ഷീല വെർജിനിയ റോഡ്രിഗ്‌സ്​, കെ എ നസ‍ീർ, പ്രദീപ്തി സജിത്ത്​, ടി ജയപ്രകാശ്​ എന്നിവർ സംസാരിച്ചു.