വി എസിനോട്​ ആദരസൂചകമായി അത്​​ലീറ്റുകളുടെ ഓട്ടം

അമ്പലപ്പുഴ

പുന്നപ്ര വയലാർ സമരനായകനും മുൻ മുഖ്യമന്ത്രിയുമായ വി എസ് അച്യുതാനന്ദനോട്​ ആദരസൂചകമായി അത്​ലീ​റ്റുകളുടെ ഓട്ടം. അത്‌ലറ്റിക്കോ ഡി ആലപ്പി ക്ലബ്ബിനു വേണ്ടി ക്ലബ്ബ് അംഗങ്ങളായ ഉണ്ണികൃഷ്ണനും അഡ്വ. സാലിഹ് മുഹമ്മദുമാണ് വയലാറിൽനിന്ന്​ വി എസ് അന്ത്യവിശ്രമം കൊള്ളുന്ന വലിയ ചുടുകാട് വരെ 25 കി.മി. ഓടിയത്. വാർധക്യത്തിലും വി എസ്​ ദിനചര്യക്കൊപ്പം കൃത്യമായ വ്യായാമം, യോഗ എന്നിവ ചെയ്തുപോന്നതിന്റെ ആദരസൂചകമായാണ് അത്​ലീറ്റുകൾ ഓടിയതെന്നും വരുംതലമുറകൾക്ക് അദ്ദേഹത്തിന്റെ ജീവിതം മാർഗദർശനമാകട്ടെയെന്നും ക്ലബ്ബ് പ്രസിഡന്റ്​ അഡ്വ. കുര്യൻ ജയിംസ് പറഞ്ഞു. പാംഫെെബർ കമ്പനി ജീവനക്കാരനാണ് ഉണ്ണികൃഷ്ണൻ. അഡ്വ. സാലിഹ് മുഹമ്മദ് ആലപ്പുഴ ബാറിലെ അഭിഭാഷകനാണ്.