വീടുകളിൽ കയറി 
അഡ്മിഷൻ തട്ടിപ്പ്

ആലപ്പുഴ

പ്ലസ്​ടുവിനുശേഷം ഉപരിപഠനം കാത്തിരിക്കുന്ന വിദ്യാർഥികളെ ഇതരസംസ്ഥാനങ്ങളിൽ എത്തിക്കാൻ വീടുകൾ കയറി ക്യാൻവാസ്ചെയ്​ത്​ വ്യാജ ഏജന്റുമാർ. ചില കോളേജുകളുടെ വക്താക്കളായി വീടുകൾ കയറുന്ന ഇവർ രക്ഷിതാക്കളുടെയും വിദ്യാർഥികളുടെയും വിശ്വാസം പിടിച്ചുപറ്റി നടത്തുന്നത് വൻതട്ടിപ്പ്. നഴ്സിങ്​ അഡ്മിഷനാണ് പ്രധാനമായും ഇവർ കുട്ടികൾക്ക് വാഗ്​ദാനംചെയ്യുന്നത്. ബംഗളൂരു, മംഗളൂരു, കോയമ്പത്തൂർ എന്നിവിടങ്ങളിൽ പഠിക്കാമെന്ന്​ പറഞ്ഞ വിശ്വസിപ്പിച്ച്​ വിദ്യാർഥികളെ എത്തിക്കുന്നത് ഇതരസംസ്ഥാനങ്ങളിലെ ഉൾപ്രദേശങ്ങളിൽ കുട്ടികളെ ലഭിക്കാത്ത, നിലവാരം കുറഞ്ഞ കോളേജുകളിലാണ്​. ഇത്തരം തട്ടിപ്പുകളിൽ വീഴാതിരിക്കാൻ വിദ്യാർഥികളും രക്ഷിതാക്കളും ജാഗ്രത പാലിക്കണമെന്നും ഇതരസംസ്ഥാനങ്ങളിൽ പഠിക്കാൻ പോകുന്നത്​ അംഗീകൃത ഏജൻസിവഴി ആണെന്ന് ഉറപ്പാക്കണമെന്നും കൺസോർഷ്യം ഓഫ് ഹയർ എഡ്യൂക്കേഷൻ കൺസൾട്ടൻസ് കേരളയ്​ക്കുവേണ്ടി പ്രസിഡന്റ് സുമോജ് മാത്യു, സെക്രട്ടറി അനൂപ് ശ്രീരാജ്, ട്രഷറർ പിബി സുനിൽ എന്നിവർ വാർത്താക്കുറിപ്പിൽ അറിയിച്ചു.