ഐ ഗ്രൂപ്പിനെ വെട്ടാൻ 
ഡിസിസി പ്രസിഡന്റിനെ​ മാറ്റുന്നു

ആലപ്പുഴ

നിയമസഭ തെരഞ്ഞെടുപ്പിന്​ മുന്നോടിയായി കോൺഗ്രസിൽ പിടിമുറുക്കാൻ ജില്ലയിലെ കെ സി വേണുഗോപാൽ വിഭാഗം. കാലങ്ങളായി ഐ ഗ്രൂപ്പിനും രമേശ്​ ചെന്നിത്തലയുടെ വിശ്വസ്​തർക്കും സ്വന്തമായിരുന്ന ഡിസിസി പ്രസിഡന്റ്​ സ്ഥാനം നഷ്​ടമായേക്കും. ജില്ലയിലെ സംഘടനാ പ്രവർത്തനങ്ങൾ താളംതെറ്റുകയും നേതാക്കൾ ഉൾപ്പെടെ രാജിവച്ച് ബിജെപിയിലേക്ക്​ അടക്കം പോവുകയുംചെയ്ത സാഹചര്യം വേണുഗോപാൽ വിഭാഗം കെപിസിസിയുടെ ശ്രദ്ധയിൽപ്പെടുത്തിയതോടെയാണ്​ ജില്ലാ അധ്യക്ഷൻ ബാബുപ്രസാദിനെ മാറ്റാൻ ആലോചിക്കുന്നത്​. 10ന് മുമ്പായി പുതിയ പ്രസിഡന്റിനെ പ്രഖ്യാപിച്ചേക്കും. കെ സി ക്യാമ്പിൽനിന്ന്​ വിശ്വസ്തനെ പുതിയ പ്രസിഡന്റാക്കാനാണ്​ നീക്കം. വർഷങ്ങളായി രമേശ് ചെന്നിത്തല നയിക്കുന്ന ഐ ഗ്രൂപ്പിലെ വിശ്വസ്തർക്കായിരുന്നു ഡിസിസി പ്രസിഡന്റ്​ സ്ഥാനം. അഞ്ചുപേരുടെ ലിസ്റ്റാണ് പ്രാഥമികമായി തയാറാക്കിയത്​. അതിൽനിന്ന്​ മൂന്നുപേരുടെ പട്ടിക അഞ്ചിന്​ വേണുഗോപാലിന് കെപിസിസി പ്രസിഡന്റ് കൈമാറും. അതിൽനിന്നൊരാളാകും ഡിസിസി പ്രസിഡന്റ്​. ഐ ഗ്രൂപ്പിന് സ്വാധീനമുള്ള ജില്ലയിൽ ചെന്നിത്തലയുടെ വിശ്വസ്​തരും പട്ടികയിലുണ്ടെങ്കിലും വെട്ടാനാണ്​ വേണുഗോപാൽ വിഭാഗത്തിന്റെ നീക്കം​. മറ്റുചില ജില്ലകളിലും ഡിസിസി പ്രസിഡന്റുമാരെ മാറ്റിയേക്കുമെന്നാണ്​ വിവരം. വിഭാഗീയത രൂക്ഷമായതിനാൽ കഴിഞ്ഞദിവസം ആലപ്പുഴ സൗത്ത് ബ്ലോക്ക് കമ്മിറ്റി പിരിച്ചുവിട്ട്​ അഡ്​ഹോക്​ കമ്മിറ്റിയ്​ക്ക്​ ചുമതല നൽകി. വേണുഗോപാലിന്റെ സ്വന്തം കമ്മിറ്റിയാണിത്.