ചേർത്തലയിൽ 2500 വീട്​ 
വെള്ളത്തിൽ

ചേര്‍ത്തല

കനത്തമഴയും ഇടവിട്ട്​ ആഞ്ഞടിക്കുന്ന കാറ്റും ചേർത്തല താലൂക്കിൽ ദുരിതംവിതച്ചു. താഴ്​ന്ന പ്രദേശങ്ങളിലും നീർത്തടങ്ങൾ നികത്തിയിടങ്ങളിലും 2500ൽപ്പരം വീടുകൾ വെള്ളത്തിലായി. പലയിടങ്ങളിലും മരങ്ങൾ റോഡിലും കെട്ടിടങ്ങളിലും പതിച്ച്​ നാശംവിതച്ചു. വൈദ്യുതിവിതരണം തടസപ്പെട്ടു. താലൂക്കിലെ എല്ലാ പഞ്ചായത്തുകളിലും നഗരത്തിലും മഴക്കെടുതിയുണ്ട്​. വീടുകൾ വെള്ളക്കെട്ടിലായതാണ്​ ആയിരക്കണക്കിന്​ കുടുംബങ്ങളെ വലയ്​ക്കുന്നത്​. പാണാവള്ളി പഞ്ചായത്ത്​ 50–-ാം നമ്പര്‍ അങ്കണവാടിയിൽ മരംവീണ്​ മേൽക്കൂര തകർന്നു. ശനി ഉച്ചയോടെയാണ്​ മരംവീണത്​. ആളപായം ഉണ്ടായില്ല. തൈക്കാട്ടുശ്ശേരി പോളേക്കടവ് ഭാഗത്ത് തണല്‍മരം സമീപത്തെ സൂപ്പര്‍മാര്‍ക്കറ്റിലേക്ക് മറിഞ്ഞുവീണു. കെട്ടിടത്തിന് കേടുപാടുണ്ടായി. റോഡിനുകുറുകെ മരം കിടന്നതിനാല്‍ ഗതാഗത തടസം ഉണ്ടായി. അഗ്നിരക്ഷാസേനയും കെഎസ്ഇബി ജീവനക്കാരും ചേര്‍ന്ന് മരം വെട്ടിമാറ്റിയാണ്​ ഗതാഗതവും വൈദ്യുതിവിതരണവും പുനഃസ്ഥാപിച്ചത്​. ചേര്‍ത്തല-–അരൂക്കുറ്റി റോഡിലും എംഎല്‍എ റോഡിലും ചിലയിടങ്ങളിൽ മരംവീണു. തൈക്കാട്ടുശേരി അടുവയില്‍നിന്ന്​ തെക്കോട്ട്​ വൈദ്യുതിവിതരണം നിലച്ചു. പാണാവള്ളി മുട്ടത്തുകടവിൽ വൈദ്യുതിലൈനില്‍ മരംവീണു. വൈദ്യുതിത്തൂണികള്‍ ചരിഞ്ഞത്​ ആശങ്ക സൃഷ്ടിക്കുന്നു. ചേർത്തല–തൈക്കൽ റോഡിൽ തൈക്കൽ പാലത്തിന്​ കിഴക്ക്​ മരംവീണ്​ ഗതാഗതം ഭാഗികമായി തടസപ്പെട്ടു.