കേരളത്തിന്റെ സ്വന്തം ‘യുപി എക്​സ്​പ്രസ്​’

കൊച്ചി

നല്ലൊരു ജീവിതം നെയ്​തെടുക്കാനാണ്​ വിജേഷ്​കുമാർ ച‍ൗഹാനും കുടുംബവും ഉത്തർപ്രദേശിലെ ബനാറസിൽനിന്ന്​ കേരളത്തിലെത്തിയത്​. മകൻ ശിവയെ ഇവിടെയുള്ള സ്​കൂളിൽ ചേർത്തപ്പോൾ പ്രതീക്ഷിച്ചത്​ മിടുക്കനാകാനുള്ള വിദ്യാഭ്യാസം. എന്നാൽ, മികച്ച വിദ്യാഭ്യാസത്തിനൊപ്പം കേരളം നൽകിയ കായികപാഠങ്ങളും സ്വായത്തമാക്കിയപ്പോൾ ശിവയിലെ വേഗക്കാരൻ ഉഷാറായി.

ജില്ലാ അത്​ലറ്റിക്സ്​​ ചാമ്പ്യൻഷിപ്പിൽ 14 വയസ്സിനുതാഴെയുള്ളവരുടെ 100 മീറ്ററിൽ പൊന്നണിഞ്ഞ്​ ശിവ ച‍ൗഹാൻ ട്രാക്കിലെ അരങ്ങേറ്റം ഗംഭീരമാക്കി. അഞ്ചിൽ പഠിക്കുമ്പോഴാണ്​ ശിവ കേരളത്തിൽ എത്തിയത്​. ജോലി തേടി എത്തിയതാണ്​ കുടുംബം. ശിവയുടെ ഓട്ടവും ആത്മാർഥതയും ഇഷ്ടപ്പെട്ടാണ്​ പരിശീലകൻ പി ആർ പുരുഷോത്തമൻ പയ്യനെ തന്റെ സ്​ക്വാഡിൽ ചേർത്തത്​. ശാന്തസ്വഭാവക്കാരനാണ്​. അധ്വാനിക്കാനുള്ള മനസ്സുമുണ്ട്​. നല്ല ഭാവിയും– പരിശീലകന്റെ നല്ലവാക്കുകളിലുണ്ട്​ കൊച്ചുശിവയുടെ മികവ്​. സെന്റ്​ ആൽബർട്സ്​ സ്​കൂളിലെ എട്ടാംക്ലാസ്​ വിദ്യാർഥിയാണ്​ ശിവ ച‍ൗഹാൻ. കേരളം എങ്ങനുണ്ടെന്ന്​ ചോദിച്ചാൽ കേരളം കൊള്ളാം എന്നാണ്​ ശിവയുടെ മറുപടി.