കനാലിൽ വീണ​ യുവാവിനെ 
അഗ്നി രക്ഷാസേന രക്ഷിച്ചു

കൊച്ചി

എറണാകുളം മാർക്കറ്റിനടുത്ത്​ കനാലിൽ വീണ്​ ചെളിയിൽ പുതഞ്ഞനിലയിൽ യുവാവിനെ അഗ്നിരക്ഷാസേനയും നാട്ടുകാരും ചേർന്ന് രക്ഷിച്ചു. വ്യാഴം രാത്രി 9.15നായിരുന്നു സംഭവം. ആളെ തിരിച്ചറിഞ്ഞിട്ടില്ല. നൽപ്പത്​ വയസ്സു തോന്നിക്കുന്നയാളെ അവശനിലയിൽ എറണാകുളം ജനറൽ ആശുപത്രിയിൽ പ്രവേശിപ്പിച്ചു.

രാത്രി കനാലിൽ ആരോ വീണതായി പരിസരവാസികളാണ്​ ആദ്യം പൊലീസിൽ അറിയിച്ചത്​. പൊലീസ്​ അറിയിച്ചതിനെ തുടർന്ന്​ ക്ലബ്​​ റോഡ്​ അഗ്നി രക്ഷാസേന സ്ഥലത്തെത്തി. കനാലിൽ തിരച്ചിൽ നടത്തിയപ്പോഴാണ്​ ചെളിയിൽ പുതഞ്ഞനിലയിൽ യുവാവിനെ കണ്ടെത്തിയത്​. അഗ്നി രക്ഷാസേന സീനിയർ ഫയർ ഓഫീസർ കെ ബി ശ്രീകുമാറിന്റെ നേതൃത്വത്തിൽ ഫയർമാൻമാരായ എം കണ്ണൻ, വിപിൻ ചന്ദ്രൻ എന്നിവർ ചേർന്നായിരുന്നു​ രക്ഷാപ്രവർത്തനം.