എറണാകുളം മാർക്കറ്റ്​ കനാൽ നവീകരണം ഉടൻ

കൊച്ചി

സംയോജിത നഗര പുനരുജ്ജീവന ജലഗതാഗത പദ്ധതി (ഐയുആര്‍ഡബ്ല്യുടിഎസ്)യുടെ ഭാഗമായി മാർക്കറ്റ് കനാലിന്റെ നവീകരണം ഉടൻ തുടങ്ങുമെന്ന്​ കെഎംആർഎൽ.

ചെളിയും മണ്ണും നീക്കി ആഴംകൂട്ടുന്നതോടൊപ്പം കനാൽതീരം സ‍ൗന്ദര്യവൽക്കരിച്ച്​ നടപ്പാത നിർമിക്കുന്നതാണ്​ പദ്ധതി.

തേവര കനാലിന്​ കുറുകെയുള്ള കല്ലുപാലം പുനർനിർമിക്കാനും നടപടി തുടങ്ങി. മംഗളവനത്തിലെ കനാലിന്റെ ഡ്രഡ്ജിങ് ജോലികൾ ഉടൻ ആരംഭിക്കുമെന്നും പേരണ്ടൂർ കനാൽ പുറമ്പോക്ക്​ നിശ്ചയിക്കുന്ന സർവേ പുരോഗമിക്കുകയാണെന്നും കെഎംആർഎൽ അറിയിച്ചു. കിഫ്​ബിയിൽനിന്നുള്ള 3710 കോടി രൂപ ചെലവഴിച്ച്​ നഗരത്തിലെ പേരണ്ടൂര്‍, ചിലവന്നൂര്‍, ഇടപ്പള്ളി, തേവര, കോന്തുരുത്തി, മാര്‍ക്കറ്റ് കനാല്‍ എന്നിവയാണ്​ ആഴവും വീതിയും കൂട്ടി ഇരുവശത്തും നടപ്പാത നിര്‍മിച്ച് നവീകരിക്കുന്നത്​.

ഇടപ്പള്ളി കനാൽ നവീകരണത്തിന്​ ഭൂമി ഏറ്റെടുക്കൽ നടപടി പുരോഗമിക്കുന്നു. മുട്ടാർമുതൽ മരോട്ടിച്ചുവടുവരെയുള്ള പൊന്നുംവില നടപടി ഉടൻ പൂർത്തിയാകും. ബാക്കി ഭാഗത്തെ ഏറ്റെടുക്കൽജോലികളും തുടങ്ങി. ചിലവന്നൂര്‍ കനാലിനു സമീപത്തുള്ള ബണ്ട് റോഡ് പാലത്തിന്റെ പുനര്‍നിര്‍മാണവും മുന്നേറുന്നു.