അധ്യാപക പ്രതിഷേധം ആളിക്കത്തി

പാലക്കാട്

​ പുതിയ വിദ്യാഭ്യാസ നയത്തിലൂടെ കേരളത്തിലെ വിദ്യാഭ്യാസ രംഗത്തെ തകർക്കാനുള്ള കേന്ദ്രസർക്കാർ ശ്രമങ്ങൾക്കെതിരെ അധ്യാപകരുടെ ഉജ്വല പ്രതിഷേധം. കേന്ദ്രസർക്കാരിന്റെ വിദ്യാഭ്യാസ നയം തിരുത്തുക, കേരളത്തോടുള്ള അവഗണന അവസാനിപ്പിക്കുക, ജോലി സംരക്ഷണം ഉറപ്പാക്കുക, ശമ്പളപരിഷ്കരണം നടത്തുക എന്നീ ആവശ്യങ്ങൾ ഉന്നയിച്ച്​ നടന്ന മാർച്ചിലും ധർണയിലും ആയിരത്തോളം അധ്യാപകർ പങ്കെടുത്തു. പാലക്കാട് വിക്ടോറിയ കോളേജ്​ പരിസരത്തുനിന്ന്​ ആരംഭിച്ച മാർച്ച്​ സ്റ്റേഡിയം സ്റ്റാൻഡിനുമുന്നിൽ സമാപിച്ചു. തുടർന്ന്​ ധർണ സിപിഐ എം കേന്ദ്ര കമ്മിറ്റിയംഗം കെ രാധാകൃഷ്ണൻ എംപി ഉദ്ഘാടനം ചെയ്​തു. നമ്മുടെ വിദ്യാഭ്യാസ നയം തകർക്കാനാണ്​ രാജ്യം ഭരിക്കുന്നവരുടെ ശ്രമം. ഭൂരിപക്ഷത്തിനും വിദ്യാഭ്യാസം നിഷേധിക്കുക എന്നത്​ ചാതുർവർണ്യ വ്യവസ്ഥയുടെ കാഴ്ചപ്പാടാണെന്നും കെ രാധാകൃഷ്ണൻ പറഞ്ഞു. ഇതാണ്​ ബിജെപി സർക്കാർ നടപ്പാക്കാൻ ശ്രമിക്കുന്നത്​. എല്ലാവർക്കും വിദ്യാഭ്യാസമെന്നത്​ ഇടതുപക്ഷ കാഴ്ചപ്പാടാണെന്നും അക്കാര്യത്തിൽ കേരളം രാജ്യത്തിന്​ മാതൃകയാണെന്നും അദ്ദേഹം പറഞ്ഞു. ക്യൂബൻ ഐക്യദാർഢ്യ ഫണ്ട്​ ശേഖരണവും നടന്നു. കെഎസ്​ടിഎ ജില്ലാ പ്രസിഡന്റ്​ എ എം അജിത്​ അധ്യക്ഷനായി. സംസ്ഥാന വൈസ്​ പ്രസിഡന്റ്​ പി എസ്​ സ്മിജ മുഖ്യപ്രഭാഷണം നടത്തി. സംസ്ഥാന നിർവാഹക സമിതിയംഗം എം ആർ മഹേഷ്​കുമാർ, സംസ്ഥാന കമ്മിറ്റിയംഗങ്ങളായ കെ പ്രസാദ്​, എൽ ഉമാമഹേശ്വരി എന്നിവർ സംസാരിച്ചു. ജില്ലാ സെക്രട്ടറി കെ അജില സ്വാഗതവും ജില്ലാ ട്രഷറർ ജി പ്രദീപ്​ നന്ദിയും പറഞ്ഞു.