കൂടുതല്‍ പരീക്ഷണം അടുത്ത ഘട്ടം

പാലക്കാട്

നിപാ പ്രതിരോധത്തിന് സഹായകമാകുമെന്ന് കരുതുന്ന മരുന്നില്‍ വരും ദിവസങ്ങളില്‍ കൂടുതല്‍ ഗവേഷണവും പരീക്ഷണങ്ങളും തുടരും. പാലക്കാട്​ ഐഐടിയിലെ ​ഗവേഷകരാണ് നിര്‍ണായക വഴിത്തിരിവിന് ഇടയാക്കുന്ന മരുന്ന് കണ്ടുപിടിച്ചതായി ശാസ്ത്ര ലോകത്തെ അറിയിച്ചത്. ഇതിന്റെ തുടര്‍ ഗവേഷണം പ്രാരംഭഘട്ടത്തിലാണ്. കൂടുതല്‍ പരീക്ഷണങ്ങള്‍ക്ക് ശേഷമേ ഇവ എത്രത്തോളം മനുഷ്യരില്‍ ഫലപ്രദമാകുമെന്ന് തെളിയുകയുള്ളു. ഐഐടി ബയോളജിക്കൽ സയൻസസ് ആൻഡ് എൻജിനിയറിങ്​ വിഭാഗത്തിലെ ഡോ. ഗിരിധരൻ ലോകനാഥൻ മലർവിഴി, പ്രൊഫ. ജഗദീഷ് ബെയ്​റി എന്നിവരാണ്​ കണ്ടുപിടിത്തത്തിന് പിന്നില്‍. ഫെഡറേഷൻ ഓഫ്​ അമേരിക്കൻ സൊസൈറ്റിസ്​ ഫോർ എക്​സ്​പെരിമെന്റൽ ഫോർ ബയോളജി(എഫ്​എഎസ്​ഇബി) ജേർണലിലാണ് ലേഖനം പ്രസിദ്ധീകരിച്ചത്. പനി, ശ്വാസകോശ രോഗങ്ങൾ എന്നിവയ്​ക്ക് ആയുർവേദത്തിലും സിദ്ധവൈദ്യത്തിലും ഉപയോഗിക്കുന്ന സസ്യജന്യ സംയുക്തങ്ങളായ ആൻഡ്രോഗ്രാഫലൈയിഡ്, സ്റ്റിഗ്മാസ്റ്റിറോൺ എന്നിവയടങ്ങിയ മരുന്ന് നിപാ പ്രതിരോധത്തിന് അത്യുത്തമമെന്ന് ലേഖനം പറയുന്നു. ഇവ വളരെ ചെലവ്​​ കുറഞ്ഞതും പൂർണസുരക്ഷിതവുമെന്നുമാണ് അവകാശപ്പെടുന്നത്. മനുഷ്യ ശരീരത്തിലെ രോഗ പ്രതിരോധശേഷി വർധിപ്പിച്ച്​ വൈറസിനെ അതിജീവിക്കുന്നതാണ്​ നിലവിൽ നിപാ വൈറസിനെതിരായ ചികിത്സാരീതി. ഇതിനായി റിംഡിസിവിർ, റിബാവിറിൻ, ഫാവിപിരാവിർ എന്നീ മരുന്നുകളാണ് ഉപയോഗിക്കുന്നത്. ഇവയേക്കാൾ ഫലവത്താണ് ഇപ്പോൾ കണ്ടുപിടിച്ച നാനോമരുന്ന്​ ഉപയോഗിച്ച ചികിത്സ. നിപാ രോഗകാരികളായ വൈറസിനെ ഇല്ലാതാക്കുന്ന രീതിയിലാണ്​ പുതിയ മരുന്ന്​ പ്രവർത്തിക്കുക. ഇതിനായി ജനിതക ഘടനയിൽ അടങ്ങിയ ‘ഫോസ്ഫോപ്രോട്ടീൻ', ആർഎൻഎ-ഡിപെൻഡന്റ്, ആർഎൻഎ പോളിമറേസ് എന്നീ രാസ സംയുക്തങ്ങളെ നശിപ്പിച്ച്​ രോഗാണുക്കളെ കൊല്ലുന്നതാണ്​ രീതി. ഇതുകൂടാതെ വിനാശകാരികളായ വൈറസുകളെക്കുറിച്ച് ഗവേഷണം നടത്താനാവശ്യമായ ചെലവ് കുറഞ്ഞ റാപിഡ് ടെസ്റ്റിങ് ഇന്നൊവേറ്റീവ് ലാബുകളുടെ നിർമാണവും ഐഐടിയിൽ പുരോഗമിക്കുന്നു.