ഈ ഒത്തൊരുമ

പാലക്കാട്

​ മഹാപ്രളയത്തെ ഒത്തൊരുമിച്ച്​ ഒരുനാടാകെ അതിജീവിച്ച കഥ പറയാനുണ്ട്​ ഇൻഡോർ സ്​റ്റേഡിയത്തിന്​. പ്രളയത്തിരയിൽ ആഴ്​ന്നുപോയ ജീവിതങ്ങളെ പ്രതീക്ഷയുടെ ലോകത്തേക്ക്​ കൈപിടിച്ചുയർത്തിയ ഇടം. പ്രളയത്തിൽ ജീവിതം പെരുവഴിയിലായവർക്കായി ആഗസ്ത്​ രണ്ടാം വാരത്തിലാണ്​ പാലക്കാട്​ ഇൻഡോർ സ്റ്റേഡിയത്തിൽ കലക്ഷ്​ൻ കേന്ദ്രം തുറന്നത്​. അന്ന്​ പാലക്കാട്​ എംപിയായിരുന്ന ഇന്നത്തെ മന്ത്രി എം ബി രാജേഷിന്റെ നേതൃത്വത്തിലായിരുന്നു പ്രവർത്തനം. സമൂഹത്തിന്റെ വിവിധ തുറകളിൽനിന്നും ചെറുതും വലുതുമായ സഹായങ്ങൾ നിമിഷനേരങ്ങൾകൊണ്ട്​ കുന്നുകൂടി. അരി, പഞ്ചസാര, ധാന്യങ്ങൾ, പലവ്യഞ്ജനങ്ങൾ, വെള്ളം, കുട്ടികൾക്കുള്ള ഭക്ഷണങ്ങൾ, സാനിറ്ററി പാഡ്​, ശുചീകരിക്കാനുള്ള വസ്​തുക്കൾ, അവശ്യമരുന്നുകൾ, വസ്​ത്രങ്ങൾ തുടങ്ങി ലക്ഷങ്ങളോളം വിലയുള്ള വസ്തുക്കൾ കേന്ദ്രത്തിലെത്തി. മെയ്യും മനസും തളരാതെ വിദ്യാർഥികളുൾപ്പെടെ നൂറോളം വളന്റിയർമാർ സാധനങ്ങൾ പായ്ക്ക്​ ചെയ്യാനും ദുരിതാശ്വാസ ക്യാമ്പുകളിലെത്തിക്കാനും അണിനിരന്നു. മാസങ്ങളോളം ക്യാമ്പ്​ അതേ ഉ‍ൗർജത്തോടെ പ്രവർത്തിച്ചു. ഒത്തൊരുമയുടെയും സാഹോദര്യത്തിന്റെയും പാഠങ്ങൾക്ക്​ എല്ലാവരും സാക്ഷിയായി. 2019ൽ പ്രളയം ആവർത്തിച്ചപ്പോഴും​ ഇൻഡോർ സ്റ്റേഡിയത്തിൽ സമാനമായി കലക്ഷ്​ൻ കേന്ദ്രം തുറന്നു. നിലമ്പൂരിനെ പിടിച്ചു കുലുക്കിയ കവളപ്പാറ ഉരുൾപ്പൊട്ടൽ ദുരന്തത്തിൽ രക്ഷപ്പെട്ടവർക്ക്​ 20 ലക്ഷം രൂപയുടെ സാധനങ്ങളെത്തിച്ചു. വേണ്ടപ്പോഴെല്ലാം സഹായം അന്വേഷിക്കുന്നവർക്ക്​ കാതോർത്തിരുന്നു.