ചിരട്ട ചില്ലറക്കാരനല്ല, 
തേങ്ങയ്​ക്കൊപ്പം താരം

സായൂജ്​ ചന്ദ്രൻ

പാലക്കാട്

ഉപയോഗശേഷം ചിരട്ട വലിച്ചെറിയാൻ വരട്ടെ. കഴിഞ്ഞ രണ്ടുമാസത്തിനുള്ളിൽ ചിരട്ടയ്​ക്ക്​ പൊള്ളുന്ന വില. ഒരു കിലോ ചിരട്ടയ്​ക്ക്​ 40 രൂപയാണ്​ മാർക്കറ്റിൽ വില. നേരത്തെ 10 മുതൽ 15 രൂപവരെയാണ്​ വിലയുണ്ടായിരുന്നത്​. തേങ്ങ വില വർധിച്ചതാണ്​​ ചിരട്ടയ്​ക്കും വില വർധിക്കാൻ കാരണം​​. കഴിഞ്ഞ വേനലിൽ ഉൽപ്പാദനം ഗണ്യമായി കുറഞ്ഞിരുന്നു. തുടർന്ന്​​ വില കുത്തനെ കുതിച്ചു​. തേങ്ങയ്​ക്ക്​ 80 മുതൽ 85 രൂപവരെ വിലയുണ്ട്​. ഇതോടെ​ ചിരട്ടയ്​ക്ക്​ മൂന്നിരട്ടി വിലയായി​​. സംസ്ഥാനത്തെ ഓയിൽ മില്ലുകളിൽനിന്നും കൊപ്രസംഭരണ കേന്ദ്രങ്ങളിൽനിന്നും​ ശേഖരിക്കുന്ന ചിരട്ടകൾ തമിഴ്​നാട്ടിലേക്കാണ്​ അയക്കുന്നത്​. പൊള്ളാച്ചി, തൂത്തുക്കുടി, കാങ്കയം എന്നിവിടങ്ങളിലുള്ള കച്ചവടക്കാർ നേരിട്ടെത്തിയാണ് ചിരട്ട ശേഖരിക്കുന്നത്​. മണ്ണാർക്കാട്​, ചിറ്റൂർ പ്രദേശങ്ങളിൽനിന്നാണ്​ കൂടുതൽ സംഭരണം​​. കരിയായി ഉപയോഗിക്കാനും കരക‍ൗശല വസ്​തുക്കൾ, ആഭരണങ്ങൾ എന്നിവ നിർമിക്കാനുമാണ്​ ചിരട്ട കൂടുതലായി ഉപയോഗിക്കുന്നത്​. ഒരു കിലോ ചിരട്ടക്കരിക്ക്​ 120 രൂപയാണ്​ വില​. വെള്ളം ശുദ്ധീകരിക്കാനും സ്വർണപ്പണിക്കായും സ‍ൗന്ദര്യ വർധകവസ്​തുക്കൾ നിർമിക്കാനും ചെടികൾക്ക്​ വളമായും കരി​ ഉപയോഗിക്കുന്നു. വിദേശ രാജ്യങ്ങളിലേക്കും കയറ്റുമതിയുണ്ട്​. കച്ചവട കേന്ദ്രങ്ങൾ കൂടാതെ ഓൺലൈനിലും ചിരട്ടയുടെയും കരിയുടെയും വിൽപ്പന തകൃതിയായി നടക്കുന്നുണ്ട്​. ഒഎൽഎക്​സിലൂടെ 33 രൂപ വിലയിൽ കച്ചവടക്കാരുമായി നേരിട്ട്​ കച്ചവടം നടത്തുന്നു. ആമസോൺ, ഫ്ലിപ്​കാർട്ട്​, ഗ്രീൻ ഡിഎൻഎ തുടങ്ങിയ പ്രമുഖ വെബ്​സൈറ്റുകളിൽ ചിരട്ടയ്​ക്ക്​ 100 മുതൽ 300 രൂപവരെ വിലയുണ്ട്​. ചിരട്ടക്കരിക്ക്​ 300 മുതൽ 500 രൂപവരെയും വിലയുണ്ട്​.