പ്രകൃതിയിലെ സ്വീറ്റ് ഹീറോ...

തേനീച്ചകൾ ഇത്രത്തോളം ഹീറോ ആവാൻ കാരണം എന്താണെന്ന്​ അറിയാമോ? രുചികരമായ തേൻ തന്നെ! പക്ഷേ, ഇവ തേൻ ഉത്പാദിപ്പിക്കുന്നത് ശീതകാലത്തേക്കുള്ള ഭക്ഷണമായി സൂക്ഷിക്കാനാണെന്ന് അറിയാമോ? ഭാഗ്യവശാൽ അവർക്ക്​ ആവശ്യമുള്ളതിനേക്കാൾ 2-3 മടങ്ങ് അധികം തേൻ തേനീച്ചകൾ ഉത്പാദിപ്പിക്കുന്നു, അതിനാൽ നമുക്കും ഈ രുചിയൂറുന്ന വിഭവം ആസ്വദിക്കാനാകും! പക്ഷെ കഴിഞ്ഞ 15 വർഷങ്ങളായി തേനീച്ചക്കൂട്ടങ്ങൾ അപ്രത്യക്ഷമാവുന്നുവെന്നാണ്​ പഠനങ്ങൾ പറയുന്നത്​.

തേനീച്ചകളുടെ രാജ്യം

തേനീച്ചകൾ പൂക്കൾക്കും പഴങ്ങൾക്കും പച്ചക്കറികൾക്കും അത്യന്തം പ്രധാനപ്പെട്ട പരാഗവാഹകരാണ്. തേനീച്ചകൾ കൂടുകളിൽ അഥവാ കോളനികളായാണ്​ ജീവിക്കുന്നത്​. കൂട്ടിലെ അംഗങ്ങളിൽ മൂന്ന്​ തരക്കാരുണ്ട്​. റാണിതേനീച്ചയാണ് കൂട്​ നിയന്ത്രിക്കുന്നത്. മുട്ടയിടുകയാണ് റാണിയുടെ ജോലി. റാണി മരിച്ചാൽ ഒരു പുതിയ റാണിയെ തെരഞ്ഞെടുക്കും. അതിനായി ഒരു കുഞ്ഞു ലാർവയെ തെരഞ്ഞെടുത്ത് അതിന് ‘റോയൽ ജെല്ലി’ എന്ന പ്രത്യേകഭക്ഷണം നൽകി പ്രജനനക്ഷമമായ ഒരു പുതിയ റാണിയാക്കി മാറ്റുന്നു.

പെൺതേനീച്ചകളാണ്​ തൊഴിലാളികൾ. ആഹാരമായ തേനും പൂമ്പൊടിയും പുഷ്പങ്ങളിൽ നിന്ന് ശേഖരിക്കുക, തേനീച്ചക്കൂട് നിർമിക്കുക, ചിറകുകൾ വീശി കൂടിനകത്തെ വായു സഞ്ചാരത്തെ ക്രമീകരിക്കുക എന്നിവയാണ് ഇവരുടെ ജോലികൾ. ആൺതേനീച്ചകൾ ​ഡ്രോൺസ് എന്നറിയപ്പെടുന്നു. പുതിയ റാണികളുമായി സമ്പർക്കത്തിലേർപ്പെടുകയാണ് ഇവരുടെ പ്രധാന ജോലി.

​

പറപറക്കും; നൃത്തം ചെയ്യും

തേനീച്ചകൾ അതിശയകരമായ പറക്കാൻ കഴിവുള്ളവയാണ്. മണിക്കൂറിൽ ഏകദേശം 25 കിലോമീറ്റർ വേഗത്തിൽ പറക്കുന്ന ഇവ ഒരു സെക്കൻഡിൽ 200 തവണ ചിറകുകൾ വീശും. തേനീച്ചയ്​ക്ക്​ നൂറ്റി എഴുപതോളം വാസനാ ഗ്രാഹകങ്ങൾ (odorant receptors) ഉണ്ട്.

അതായത് അതിതീവ്രമായ ഘ്രാണശക്തിയുണ്ട്! ഈ ഘ്രാണശക്തി ഉപയോഗിച്ച് പരസ്പരം ആശയവിനിമയം നടത്തുകയും പുഷ്പങ്ങളെ തിരിച്ചറിയുകയും ചെയ്യുന്നു.

തേനീച്ചകൾ ഭംഗിയായി നൃത്തം ചെയ്യുന്നവരുമാണ്​. നല്ല ആഹാര ഉറവിടത്തെക്കുറിച്ച് വിവരം പങ്കുവെയ്ക്കാൻ അവ ‘വാഗിൾ ഡാൻസ്’ എന്ന നൃത്തം ചെയ്യും. തൊഴിലാളി തേനീച്ചകളുടെ ആയുസ്​ ഏകദേശം അഞ്ചു മുതൽ ആറു ആഴ്ച വരെയാണ്. ഈ കാലയളവിനുള്ളിൽ അവർ ഏകദേശം പന്ത്രണ്ട് ടീസ്പൂണോളം തേൻ ഉത്പാദിപ്പിക്കും. റാണി തേനീച്ചക്ക് അഞ്ചുവർഷം വരെ ജീവിക്കാൻ കഴിയും. വേനൽക്കാലത്ത്​ ഒരു ദിവസം രണ്ടായിരത്തിഅഞ്ഞൂറോളം മുട്ടകൾ ഇവ ഉൽപാദിപ്പിക്കുന്നു.

​

കോളനികൾ തകരുന്നു...!

ഒരു തേനീച്ചക്കൂട്ടത്തിലെ ഭൂരിഭാഗം തൊഴിലാളി തേനീച്ചകളും അപ്രത്യക്ഷമാകുന്ന അസാധാരണ പ്രതിഭാസമാണ് കോളനി കൊളാപ്സ് ഡിസോർഡർ ( സിസിഡി ). ഈ പ്രതിഭാസം Disappearing disease, spring dwindle, May disease, autumn collapse, fall dwindle disease എന്നീ പേരുകളിൽ അറിയപ്പെടുന്നുണ്ട്​. വടക്കേ അമേരിക്കയിലെ തേനീച്ച കോളനികളുടെ ( ആപിസ് മെല്ലിഫെറ) തിരോധാനം കൂടുതലായി റിപ്പോർട്ട്​ ചെയ്​തതോടെ 2007 ൽ ഇതിനെ കോളനി കൊളോപ്സ് ഡിസോർഡർ എന്ന് പുനർനാമകരണം ചെയ്തു. പരാഗസമ്പർക്കം ​ കുറയുമെന്നതിനാൽ കാർഷികമേഖലയിലാണ്​​ ഇത്​ ആശങ്ക സൃഷ്​ടിക്കുന്നത്​. പക്ഷെ ഐക്യരാഷ്ട്രസംഘടനയുടെ ഫുഡ്​ ആൻഡ്​ അഗ്രിക്കൾച്ചറൽ ഓർഗനൈസേഷൻ കണക്ക്​ പ്രകാരം 1990 മുതൽ 2021 വരെ ലോകമെമ്പാടുമുള്ള തേനീച്ച കോളനികളുടെ എണ്ണം 47% വർധിച്ച് 102 ദശലക്ഷത്തിലെത്തിയെന്നാണ്.

- കീടനാശിനികളുടെ അമിതമായ ഉപയോഗം, രോഗങ്ങൾ ,- പോഷകാഹാരക്കുറവ്, ജനിതക ഘടകങ്ങൾ,- പ്രതിരോധ ശേഷിക്കുറവ് , പരിസ്ഥിതിനാശം എന്നിവയാണ്​ തേനീച്ച കോളനികൾ കുറയാൻ കാരണമായി പറയുന്നത്​. തേനീച്ച സമൂഹത്തെ സംരക്ഷിക്കാൻ നമുക്കും ചില കാര്യങ്ങൾ ചെയ്യാനാകും. സമൃദ്ധമായ ചെടികൾ നട്ടുപിടിപ്പിച്ചാൽ തേനീച്ചകൾക്ക് ആഹാരം കണ്ടെത്താനാവുകയും നമുക്ക് മായം കലരാത്ത ശുദ്ധമായ തേൻ ലഭ്യമാവുകയും ചെയ്യും.