സ്കോർപിയോ പ്രേമികളാണോ നിങ്ങൾ; 20ലക്ഷത്തിന് കാർ സ്വന്തമാക്കാം; പുത്തൻ വേരിയന്റ് പുറത്തിറക്കി മഹീന്ദ്ര

മുബൈ : സ്കോർപിയോ എൻ മഹീന്ദ്ര പുറത്തിറക്കി. സ്കോർപിയോ-എൻ ന്റെ ലെവൽ 2 അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റംസ് (ADAS) സഹിതമുള്ള അപ്‌ഡേറ്റ് ചെയ്ത പതിപ്പോടുകൂടിയാണ് ഇറക്കിയിരിക്കുന്നത്. മാനുവൽ ട്രാൻസ്മിഷനോടുകൂടിയ ഈ പുതിയ വേരിയന്റിന് 20.29 ലക്ഷം രൂപയാണ് പ്രാരംഭ വില.

അതേസമയം, ടോപ്പ്-എൻഡ് Z8L വേരിയന്റിൽ എഡിഎസ് ചേർത്തിട്ടുണ്ട്, ആറ് സീറ്റർ കോൺഫിഗറേഷനും 4WD എറ്റി ഉള്ള ഡീസൽ എഞ്ചിനുമുള്ള പതിപ്പിന് ഇപ്പോൾ 25.42 ലക്ഷം രൂപ (എക്സ്-ഷോറൂം) വിലയുണ്ട്.

അഡാപ്റ്റീവ് ക്രൂയിസ് കൺട്രോൾ, ലെയ്ൻ-കീപ്പിംഗ് അസിസ്റ്റ്, ഓട്ടോമാറ്റിക് എമർജൻസി ബ്രേക്കിംഗ്, ഫോർവേഡ് കൊളീഷൻ വാണിംഗ് തുടങ്ങി നിരവധി സുരക്ഷാ സവിശേഷതകൾ ലെവൽ 2 ADAS വാഗ്ദാനം ചെയ്യുന്നു. മഹീന്ദ്രയുടെ ഓഫറുകളിൽ, XUV3XO, XUV700, പുതുതായി അവതരിപ്പിച്ച ഥാർ റോക്സ് തുടങ്ങിയ മോഡലുകളിൽ ഈ സവിശേഷതകൾ ഇതിനകം തന്നെ ഉണ്ട്. യാത്രക്കാരുടെ സുരക്ഷയ്ക്ക് മുൻഗണന നൽകുന്നതിനായി, ബ്രാൻഡിന്റെ ഇലക്ട്രിക് വാഹനങ്ങളായ BE6, XEV 9e എന്നിവയിലും ഈ സവിശേഷതകൾ ഉൾപ്പെടുത്തിയിട്ടുണ്ട്.

കൂടാതെ, സ്കോർപിയോ-എൻ ന്റെ എഡിഎസ് പാക്കേജിൽ ഡ്രൈവർമാർക്ക് നിലവിലെ വേഗത പരിധികളെക്കുറിച്ച് മുന്നറിയിപ്പ് നൽകുന്ന സ്പീഡ് ലിമിറ്റ് അസിസ്റ്റ്, മുന്നിലുള്ള വാഹനം നീങ്ങാൻ തുടങ്ങുമ്പോൾ ഡ്രൈവർമാരെ അറിയിക്കുന്ന ഫ്രണ്ട് വെഹിക്കിൾ സ്റ്റാർട്ട് അലേർട്ട് തുടങ്ങിയ സെഗ്‌മെന്റ്-ഫസ്റ്റ് സവിശേഷതകളും ഉൾപ്പെടുന്നു.