എഎപി എംഎൽഎ വീട്ടിനുള്ളിൽ വെടിയേറ്റ നിലയിൽ

ചണ്ഡീ​ഗഡ്: പഞ്ചാബിൽ എഎപി എംഎൽഎയെ വീട്ടിനുള്ളിൽ വെടിയേറ്റ നിലയിൽ കണ്ടെത്തി. ലുധിയാന എംഎൽഎയായ ഗുർപ്രീത് ഗോഗി ബാസി(57)യെയാണ് ദുരൂഹ സാഹചര്യത്തിൽ മരിച്ച നിലയിൽ കണ്ടെത്തിയത്. ഇന്നലെ അർധരാത്രിയോടെയാണ് സംഭവം. വെടിയൊച്ച കേട്ടെത്തിയ കുടുംബാം​ഗങ്ങൾ എംഎൽഎയെ ഉടൻ ആശുപത്രിയിൽ പ്രവേശിപ്പിച്ചെങ്കിലും മരണം സംഭവിച്ചിരുന്നു. സ്വയം വെടിവെച്ചതാണെന്നാണ് പ്രാഥമിക നി​ഗമനം. സംഭവത്തിൽ അന്വേഷണം പുരോ​ഗമിക്കുകയാണ്.
ഗോ​ഗി 2022ലാണ് ആം ആദ്മി പാർടിയിൽ ചേരുന്നത്. എംഎൽഎ ആകുന്നതിന് മുൻപ് രണ്ട് തവണ എംസി കൗൺസിലറായും സേവനമനുഷ്ഠിച്ചിട്ടുണ്ട്. ഇന്നലെ പൊതുപരിപാടികളിൽ പങ്കെടുക്കുകയും വൈകുന്നേരം കുടുംബത്തോടൊപ്പം സമയം ചെലവഴിക്കുകയും ചെയ്തതായി പൊലീസ് പറയുന്നു. മൃതദേഹത്തിന്റെ പൊസ്റ്റ്മോർട്ടം നടപടികൾ ഇന്ന് നടക്കും.