ജെഎൻയുവിലെ ഇടതുസഖ്യത്തിന്റെ വിജയം വർഗീയ ഫാസിസ്റ്റ് ശക്തികൾക്ക് എതിരായ വിദ്യാർഥി പ്രക്ഷോഭം: എസ്എഫ്ഐ

ന്യൂഡൽഹി: ജെഎൻയു യൂണിയൻ തെരഞ്ഞെടുപ്പിൽ സംഘപരിവാറിന്റെ വർഗീയവും വിഭജനപരവുമായ രാഷ്ട്രീയത്തെ നിശ്ചയദാർഢ്യത്തോടെ നിരാകരിച്ച വിദ്യാർഥികൾക്ക് ആശംസകളുമായി എസ്എഫ്ഐ. ഇടതുസഖ്യത്തെ വിജയിപ്പിച്ചതിലൂടെ ജെഎൻയു വിദ്യാർഥികൾ സർവകലാശാലയുടെ പുരോഗമനപരവും, ജനാധിപത്യപരവും, മതേതരവുമായ പാരമ്പര്യത്തോടുള്ള തങ്ങളുടെ പ്രതിബദ്ധത ഒരിക്കൽ കൂടി ഉറപ്പിച്ചിരിക്കുകയാണെന്ന് എസ്എഫ്ഐ പറഞ്ഞു.

ഈ ഉജ്ജ്വല വിജയം, തീവ്രവലതുപക്ഷ സ്വേച്ഛാധിപത്യത്തോടുള്ള വ്യക്തമായ നിരാകരണവും, വിമർശനാത്മക ചിന്തയുടെയും പ്രതിരോധത്തിന്റെയും കോട്ടയെന്ന നിലയിലുള്ള ജെഎൻയുവിന്റെ പങ്ക് തുടർച്ചയായി ഉറപ്പിക്കുന്നതുമാണ്.

എസ്‌എഫ്‌ഐ, ഐസ, ഡിഎസ്‌എഫ്‌ സംഘടനകളുൾപ്പെടുന്ന വിദ്യാർഥിസഖ്യം മുഴുവൻ ജനറൽ സീറ്റുകളിലും വിജയിച്ചു. കഴിഞ്ഞ തവണ എബിവിപി വിജയിച്ച ജോയിന്റ്‌ സെക്രട്ടറി പോസ്റ്റിലും ഇത്തവണ ഇടതുപക്ഷ സഖ്യം നേടി. എസ്എഫ്ഐയുടെ വൈസ് പ്രസിഡന്റ് സ്ഥാനാർത്ഥിയായ കെ ഗോപികാ ബാബു ഏകദേശം 1,500 വോട്ടുകളുടെ ശ്രദ്ധേയമായ ഭൂരിപക്ഷത്തിലാണ് വിജയിച്ചത്. ഇത് കാമ്പസിനുള്ളിലെ ഇടതുപക്ഷ പുരോഗമന പ്രസ്ഥാനത്തിന് ഒരു സുപ്രധാന രാഷ്ട്രീയ നേട്ടമാണ്.

ഈ തെരഞ്ഞെടുപ്പ് ഫലം കേവലം ഒരു സംഖ്യാപരമായ വിജയമല്ല, മറിച്ച് വിദ്വേഷത്തിന്റെയും വർഗീയ ധ്രുവീകരണത്തിന്റെയും കാവിവത്കരണത്തിന്റെയും രാഷ്ട്രീയത്തിനെതിരായ ശക്തമായ രാഷ്ട്രീയ പ്രസ്താവനയാണ്. ജെഎൻയു വിദ്യാർഥി സമൂഹം ഇപ്പോഴും ഉൾക്കൊള്ളൽ, സാമൂഹിക നീതി, പുരോഗമന രാഷ്ട്രീയം എന്നീ മൂല്യങ്ങൾ ഉയർത്തിപ്പിടിക്കുന്നു എന്ന് ഈ ഫലങ്ങൾ വീണ്ടും സ്ഥിരീകരിക്കുന്നു. വലതുപക്ഷത്തിന്റെ വിഭജന അജണ്ടക്ക് മേൽ, കൂട്ടായതും വിഷയങ്ങളെ അടിസ്ഥാനമാക്കിയുള്ളതുമായ രാഷ്ട്രീയത്തിന്റെ നിലനിൽക്കുന്ന ശക്തിയെയാണ് കേന്ദ്ര പാനലിലും സ്കൂൾ കൗൺസിലർ സ്ഥാനങ്ങളിലും ഇടതുപക്ഷ ഐക്യത്തിന്റെ വിജയം കാണിക്കുന്നത്. എസ്എഫ്ഐ പറഞ്ഞു.