തെലങ്കാനയിൽ ആദ്യ ഗില്ലൻബാ സിൻഡ്രോം കേസ് റിപ്പോർട്ട് ചെയ്തു

ഹൈദരാബാദ്: തെലങ്കാനയിൽ ആദ്യ ഗില്ലൻബാ സിൻഡ്രോം (ജിബിഎസ്) കേസ് റിപ്പോർട്ട് ചെയ്തു. സിദ്ദിപേട്ട് ജില്ലയിൽ നിന്നുള്ള ഇരുപത്തിയഞ്ചുകാരിക്കാണ് രോ​ഗം സ്ഥിരീകരിച്ചത്. യുവതിയെ തെലങ്കാനയിലെ സ്വകാര്യ ആശുപത്രിയിൽ ചികിത്സയിൽ പ്രവേശിപ്പിച്ചു. ആരോഗ്യ നില ഗുരുതരമായതോടെ യുവതിയെ വെന്റിലേറ്ററിലേക്ക് മാറ്റിയതായാണ് വിവരം. നിലവിൽ പൂനെയിലും പരിസര പ്രദേശങ്ങളിലും രോ​ഗവ്യാപനമുണ്ട്. എന്നാൽ യുവതി ചികിത്സയുലുള്ള ആശുപത്രി അധികൃതർ പുറത്ത് വിട്ട റിപ്പോർട്ട് പ്രകാരം രോഗിയോ രോ​ഗിയുടെ അടുത്ത ബന്ധുക്കളോ പൂനെയിലോ പരിസര പ്രദേശങ്ങളിലേക്കോ യാത്ര ചെയ്തിട്ടില്ല.

മഹാരാഷ്ട്ര ആരോ​ഗ്യ വകുപ്പിന്റെ കണക്ക് പ്രകാരം സംസ്ഥാനത്ത് 130 പേർക്ക് രോ​ഗം ബാധിച്ചിട്ടുണ്ടെന്നാണ് സംശയിക്കുന്നത്. ഇവരെ നിരീക്ഷിച്ച് വരികയാണ്. രോ​ഗം ബാധിച്ച് രണ്ട് പേർ മരിച്ചതായും റിപ്പോർട്ട് ഉണ്ട്. എന്നാൽ ഇത് ഔദ്യോ​ഗികമായി സ്ഥിരീകരിച്ചിട്ടില്ല. പൂനെയിൽ ജിബിഎസ് പടർന്ന് പിടിച്ചത് മലിന ജലസ്രോതസ്സുകളിൽ നിന്നാണെന്നാണ് റിപ്പോർട്ടുകൾ. മലിനമായ ഭക്ഷണത്തിലും വെള്ളത്തിലും കാണപ്പെടുന്ന കാംപിലോബാക്റ്റർ ജെജുനി എന്ന ബാക്ടീരിയയാണ് നാഡീ വ്യവസ്തയെ ട്രി​ഗർ ചെയ്തത് എന്നാണ് കരുതപ്പെടുന്നത്.

മനുഷ്യരുടെ രോഗപ്രതിരോധശക്തി സ്വന്തം നാഡീവ്യൂഹത്തെ തന്നെ ‘അബദ്ധവശാൽ’ ആക്രമിക്കുന്ന ഗുരുതര അവസ്ഥയാണ് ഗില്ലൻബാ സിൻഡ്രോം. നാഡീവ്യവസ്ഥയെ ബാധിക്കുന്നതായതിനാൽ ശ്രദ്ധിച്ചില്ലെങ്കിൽ അപകടസാധ്യത കൂടുതലാണ്. വൈറസോ ബാക്ടീരിയയോ കാരണമുണ്ടാകുന്ന അണുബാധയ്ക്ക് പിന്നാലെയാണ്‌ പൊതുവേ ഈ രോഗമുണ്ടാകുന്നത്. ആദ്യം കാലുകളിലെയും പിന്നീട്‌ ഉടലിലെയും പേശികളെ രോഗം തളർത്തുന്നു. മുഖത്തെ പേശികൾ ചലിപ്പിക്കാൻ കഴിയാത്ത സാഹചര്യവും ഉണ്ടാകാം.