ഛത്തീസ്‌ഗഡിൽ ഏറ്റുമുട്ടൽ: 16 മാവോയിസ്റ്റുകളെ വധിച്ചു, രണ്ട് സുരക്ഷാ ഉദ്യോഗസ്ഥർക്ക് പരിക്ക്

റായ്പൂർ : ഛത്തീസ്​ഗയിൽ മാവോയിസ്റ്റുകളും സുരക്ഷാ സേനയും തമ്മിൽ ഏറ്റുമുട്ടൽ. 16 മാവോയിസ്റ്റുകളെ വധിച്ചു. രണ്ട് സുരക്ഷാ ഉദ്യോ​ഗസ്ഥർക്ക് പരിക്കേറ്റു. ഛത്തീസ്​ഗഡിലെ സുഖ്മ ജില്ലയിലാണ് ഏറ്റുമുട്ടലുണ്ടായത്. രാവിലെ എട്ടോടെയാണ് കേർളാപൽ പൊലീസ് സ്റ്റേഷൻ പരിധിയിലുള്ള വനമേഖലയിൽ ഏറ്റുമുട്ടലുണ്ടായത്. പൊലീസും സുരക്ഷാ ഉദ്യോ​ഗസ്ഥരുമടങ്ങുന്ന സംയുക്ത സംഘം വനമേഖലയിൽ തിരച്ചിൽ നടത്തുന്നതിനിടെ വെടിവയ്പ് ഉണ്ടാവുകയായിരുന്നു.

സംസ്ഥാന പൊലീസിന്റെ ഭാ​ഗമായ ഡിസ്ട്രിക്ട് റിസർവ് ​ഗാർഡിലെ (DRG) ഉദ്യോ​ഗസ്ഥർക്കാണ് പരിക്കേറ്റത്. 16 മാവോയിസ്റ്റുകളുടെ മൃതദേഹം കണ്ടെത്തിയതായും പ്രദേശത്ത് തിരച്ചിൽ തുടരുകയാണെന്നും ഉദ്യോ​ഗസ്ഥർ പറഞ്ഞു. ഒരു എകെ 47 റൈഫിൾ, സെൽഫ് ലോഡിങ് റൈഫിൾ, 303 റൈഫിൾ, റോക്കറ്റ് ലോഞ്ചർ, ബാരൽ ​ഗ്രനേഡ് ലോഞ്ചർ, വെടിമരുന്നുകൾ എന്നിവയും സ്ഥലത്തുനിന്ന് കണ്ടെത്തിയതായി പൊലീസ് വ്യക്തമാക്കി. ഈ വർഷം ഇതുവരെ 132 മാവോയിസ്റ്റുകളെയാണ് വധിച്ചത്. ഇതിൽ 116 പേരെയും ബസ്തർ വനമേഖലയിൽ വച്ചാണ് വധിച്ചത്.